Zjarret gjatë stinës së verës dhe përmbytjet në dimër mbeten ndër fatkeqësitë natyrore më të shpeshta që prekin Shqipërinë, duke kërkuar një sistem më të integruar dhe të koordinuar të mbrojtjes civile. Për të përmirësuar këtë reagim, Ministria e Mbrojtjes ka ndërmarrë nismën për të ndryshuar ligjin e vitit 2019 për mbrojtjen civile.
Sipas projektligjit të ri, qendrat rajonale të mbrojtjes civile do të pajisen me funksione dhe detyra më të mirëpërcaktuara. Ato do të koordinojnë zbatimin e politikave për zvogëlimin e riskut nga fatkeqësitë dhe mbrojtjen civile ndërmjet institucioneve dhe strukturave vendore në rajonin përkatës, si dhe do të udhëheqin operacionet për përballimin e emergjencave. Po ashtu, këto qendra do të merren me organizimin e trajnimeve për personelin dhe përgatitjen e planeve të gatishmërisë.
Në nivel vendor, bashkitë dhe prefekti i qarkut ruajnë rolin parësor dhe mbajnë përgjegjësinë kryesore në zvogëlimin e riskut dhe mbrojtjen civile. Një detyrim i ri që i shtohet bashkive është verifikimi i planeve të brendshme për emergjencat civile të bizneseve që ushtrojnë aktivitet në territorin e tyre, si dhe certifikimi i përputhshmërisë së këtyre planeve me dokumentin vendor të emergjencave.
Strukturat operacionale të angazhuara në këto situata, të cilat përfshijnë Forcat e Armatosura, Policinë e Shtetit, Shërbimin e Mbrojtjes nga Zjarri dhe Shpëtimit, Urgjencën Mjekësore, strukturat e tjera shëndetësore dhe shërbimin e vullnetarëve, të certifikuara sipas kritereve të Mekanizmit Evropian të Mbrojtjes Civile, do të duhet të ngrenë Modulet e Përhershme të Emergjencave Civile. Drafti i ri parashikon gjithashtu mundësinë që efektivët e këtyre strukturave të marrin pjesë në misione ndihme jashtë kufijve të vendit në kuadër të të njëjtit mekanizëm evropian.
Ndërkohë, Agjencia Kombëtare e Mbrojtjes Civile, nëpërmjet Qendrës Kombëtare të Trajnimeve për Mbrojtjen Civile, do të sigurojë formimin profesional dhe trajnimin e vazhdueshëm për nëpunësit e strukturave qendrore e vendore, vullnetarët dhe subjektet private. Për bizneset, tarifat e trajnimit nuk do të mund t'i kalojnë kostot mesatare të nevojshme për realizimin e tyre.
