Shqiptarët vazhdojnë t'i shmangen sigurimit të pronës nga zjarri, edhe pas një vere me zjarre të shumta në vend. Sipas të dhënave të Autoritetit të Mbikëqyrjes Financiare (AMF) për periudhën janar-shtator 2026, primet e shkruara bruto për sigurimin nga zjarri dhe fatkeqësitë natyrore zbritën në rreth 1.6 miliardë lekë, nga 1.9 miliardë lekë që ishin në të njëjtën periudhë të vitit të kaluar, një rënie prej 14.3%.
Gjatë muajve të verës, zjarret prekën zona të shumta, nga Mallakastra, Kruja dhe Dajti deri në Malësinë e Madhe, Kavajë dhe Kurbin, duke rikthyer në qendër të vëmendjes rrezikun për banesat, bizneset dhe pronat. Megjithatë, shifrat tregojnë se ky rrezik nuk është përkthyer në një kërkesë më të lartë për mbrojtje financiare.
Kompanitë paguajnë më shumë
Në anën tjetër, shoqëritë e sigurimit kanë paguar shuma më të mëdha për dëmet. Në nëntë muajt e parë të vitit, dëmshpërblimet për sigurimin nga zjarri dhe fatkeqësitë natyrore arritën në rreth 471 milionë lekë, krahasuar me 356 milionë lekë një vit më parë, me një rritje që kalon 32%.
Kështu, ndërkohë që vlera e dëmeve të paguara shtohet, të ardhurat nga primet për këtë lloj sigurimi po tkurren. Ky kontrast tregon se ekspozimi ndaj rrezikut nuk po shoqërohet me interes më të madh nga qytetarët dhe bizneset për t'u mbrojtur.
Rritja e dëmshpërblimeve nuk nënkupton domosdoshmërisht se ka më shumë prona të siguruara. Ajo tregon kryesisht se kompanitë kanë paguar më shumë për dëmet e raportuara.
Një mbrojtje ende e nënpërdorur
Të dhënat e AMF-së dëshmojnë se sigurimi i pronës nga zjarri mbetet një instrument që shqiptarët nuk e shfrytëzojnë mjaftueshëm, edhe në rastet kur rreziku bëhet i prekshëm dhe pasojat mund të jenë të konsiderueshme për familjet dhe bizneset.
