Sigurimi i pronës në Shqipëri mbetet një treg i përqendruar pothuajse tërësisht në kryeqytet. Në vitin 2025, rreth 92% e primeve të shkruara bruto për sigurimet nga zjarri, forcat e natyrës dhe dëmtimet e tjera në pronë u regjistruan në Qarkun e Tiranës, nga 91% që ishte ky nivel një vit më parë. Këto të dhëna dalin nga raporti i Gjeografisë së Sigurimeve, i publikuar nga Autoriteti i Mbikëqyrjes Financiare (AMF), i cili tregon se pjesa tjetër e vendit ka një mbulim të papërfillshëm ndaj fatkeqësive natyrore, zjarrit apo dëmeve të tjera në pronë.

Pesha e Tiranës është e madhe edhe kur shihet numri i kontratave. Kryeqyteti përfaqëson 85% të totalit të kontratave të sigurimit të pronës, ndërkohë që një vit më parë kjo pjesë ishte rreth 80%.

Pse primet përqendrohen në kryeqytet

Përveç hendekut në zhvillimin ekonomik mes Tiranës dhe rretheve, përqendrimi i këtij produkti lidhet ngushtë me tregun e pasurive të paluajtshme dhe me ecurinë e kreditimit bankar. Një pjesë e konsiderueshme e blerjeve të pronave financohet me kredi, dhe duke qenë se tregu i pasurive të paluajtshme dominohet nga Tirana, edhe primet e sigurimit nga katastrofat përqendrohen kryesisht aty.

Një faktor tjetër që e thellon këtë përqendrim është vlera e pronave që sigurohen. Në Tiranë, vlera e pronës ose e përgjegjësisë së siguruar është më e lartë, çka sjell edhe prime sigurimi në shuma më të mëdha.

Vetëm një pjesë e vogël e banesave të siguruara

Gjatë vitit të kaluar, në Shqipëri u shitën rreth 63 mijë polica për sigurimin e pronës nga katastrofat. Prej tyre, pothuajse 54 mijë u shitën në Qarkun e Tiranës.

Edhe nëse të gjitha policat e sigurimit të pronës do të konsideroheshin si sigurime banesash, në rastin më optimist në Shqipëri do të rezultonin të siguruara jo më shumë se 5.8% e numrit total të banesave, duke marrë si referencë Censin e vitit 2023. Për Qarkun e Tiranës, ky tregues rritet ndjeshëm në 16.6%, ndërsa për pjesën tjetër të vendit mbulimi mesatar me sigurime prone bie në vetëm 1.2%.

Projektligji për sigurimin e detyrueshëm nga tërmetet

Në vitet e fundit, qeveria shqiptare ka hedhur për konsultim publik një projektligj për sigurimin e detyrueshëm të banesave nga tërmetet. Dokumenti parashikon që të gjitha banesat në vend të sigurohen detyrimisht, me disa përjashtime, si shtëpitë e ndërtuara me argjilë, qerpiç ose kallam, si dhe ndërtesat me vendndodhje të lëvizshme apo të përkohshme.

Skema do të administrohet nga një ent i posaçëm me kapital shtetëror, i cili do të krijohet për këtë qëllim: Fondi Kombëtar për Sigurimin e Detyrueshëm nga Tërmetet. Shuma e sigurimit do të vendoset me vendim të Këshillit të Ministrave, ndërsa primi që do të paguajnë pronarët e banesave do të përcaktohet nga Fondi për tërmetet, pasi të marrë pëlqimin e ministrit përgjegjës për Financat. Për shtresat në nevojë, primi do të mbulohet nga buxheti i shtetit.

Shpenzimi për sigurim mbetet i ulët

Në total, primet e sigurimit nga zjarri, forcat e natyrës dhe dëmet e tjera në pronë arritën vitin e kaluar në 2.83 miliardë lekë, ose rreth 29.2 milionë euro. Kjo shumë përkthehet në më pak se 13 euro prime sigurimi në vit për frymë, ose afërsisht 39 euro për familje, një nivel që tregon sa i kufizuar mbetet ende ky produkt në tregun shqiptar.