Platforma sociale TikTok, në pronësi të ByteDance, është akuzuar se ka shkelur rregullat e BE-së për përmbajtjen online, për shkak të karakteristikave të dizajnit që mund t’i ekspozojë fëmijët përballë njerëzve keqdashës apo bullizmit kibernetik – thanë të premten autoritetet rregullatore të BE-së, duke e vënë kompaninë në rrezik për një gjobë të rëndë.
Akuzat, të përkufizuara “gjetje paraprake” sipas Aktit të Shërbimeve Digjitale (Digital Services Act – DSA), i cili u kërkon kompanive të mëdha teknologjike të angazhohen më shumë për të luftuar përmbajtjet e paligjshme dhe të dëmshme – përfaqësojnë denoncimin e katërt kundër TikTok-ut në dy vjet.
Komisioni Europian, i cili përfaqëson autoritetin rregullator në fushën e teknologjisë në BE, tha se llogaritë e TikTok-ut nuk i përmbushin standardet e sigurisë të parashikuara nga DSA.
Ai theksoi se platforma e rrjetit social i lejon fëmijët ta bëjnë publike llogarinë e tyre, duke u mundësuar të tjerëve të shohin përmbajtjen dhe duke i ekspozuar ata ndaj ngacmimeve të mundshme kibernetike ose kontakteve nga keqbërësit.
Në raport thuhet se as llogaritë private nuk janë të sigurta për fëmijët pasi mund të gjenden lehtësisht përmes listës së ‘following’ dhe ‘followers’ të përdoruesve të tjerë, madje edhe nga njerëz që nuk kanë një llogari TikTok.
TikTok duhet të rregullojë funksionet e paracaktuara të llogarive publike të të miturve në mënyrë që përmbajtjet të jenë, si parazgjedhje, të dukshme vetëm për përdoruesit e TikTok-ut që pranohen nga fëmijët, tha Komisioni.
TikTok deklaroi se do të shqyrtojë përfundimet e BE-së dhe do të bashkëpunojë në mënyrë konstruktive me autoritetet rregullatore.
“Llogaritë e adoleshentëve në TikTok kanë më shumë se 50 funksione të paracaktuara të privatësisë dhe të sigurisë, të zhvilluara me ndihmën e ekspertëve, që nga momenti i krijimit të llogarive” – tha kompania TikTok.
“Llogaritë e përdoruesve nën 18 vjeç janë private si parazgjedhje dhe ne jemi një nga të paktat platforma ku adoleshentët më të rinj nuk mund të përdorin mesazhe direkte ose të shohin përmbajtjet e tyre të shfaqen në For You feed”, tha TikTok.
Platforma sociale TikTok tani mund të shqyrtojë dokumentet e Komisionit dhe të përgjigjet para se autoriteti mbikëqyrës të marrë një vendim që mund të përfshijë një gjobë deri në 6% të xhiros së tij vjetore globale.
“Akti për Shërbimet Digjitale u kërkon platformave që të marrin masa mbrojtëse për të miturit kur projektojnë shërbimet e tyre, dhe i bën ato përgjegjëse kur dështojnë ta bëjnë këtë” – tha Henna Virkkunen, kreu i teknologjisë së BE-së, në një deklaratë.
“Një nivel i lartë mbrojtjeje nuk duhet të jetë i një funksion me zgjedhje; ai duhet të jetë parazgjedhje.”
/ Reuters
Postimi ” TikTok akuzohet për shkelje të rregullave teknologjike të BE-së për sigurinë online të fëmijëve ” eshte marre nga Revista Monitor.
