Ministri i Financave, Petrit Malaj, gjatë seancës së sotme për miratimin e Aktit Normativ për ndryshime në ligjin për akcizat, tha se masat e marra në vend për uljen e çmimeve të karburanteve janë në linjë me praktikat e vendeve europiane dhe të rajonit.
Sipas ministrit Malaj, Akti Normativ “Për ligjin e akcizave” që propozoi ulje me 20% të akcizës, në rast se çmimi i shitjes me pakicë, përcaktuar nga Bordi i Transparencës është për naftën mbi 220 lekë/litër ndërsa për benzinën mbi 200 lekë/ litër është aplikuar vetëm në 2 raste.
Sipas tij efekti financiar nga aplikimi i kësaj mase llogaritet në rreth 37 milionë lekë të ardhura të munguara nga akciza, një kosto e përballueshme për buxhetin, në funksion të mbrojtjes së qytetarëve.
“ Më konkretisht: U propozua ulja e nivelit të akcizës me 20% ose me rreth 7.8 lekë për litër, pra nga rreth 39.37 lekë/litër në rreth 31.5 lekë/litër, në rast se çmimi i shitjes me pakicë, përcaktuar nga Bordi i Transparencës është për naftën mbi 220 lekë/litër ndërsa për benzinën mbi 200 lekë/ litër.
Ulja e nivelit të akcizës, gjithashtu, ndikon edhe në uljen e TVSH-së së llogaritur në momentin e importimit, – 1.58 lekë/litër. Pra në total ulja e akcizës dhe nga TVSH në import ulja e taksave llogaritet në 9.45 lekë për litër .
Pra, një ndikim i drejtpërdrejt në zbutjen e rritjes së çmimeve për konsumatorin final.
- Deri tani janë zhvilluar 16 mbledhje të Bordit të Transparencës, përmes së cilave është ndërhyrë në mënyrë të vazhdueshme për stabilizimin e çmimit të shitjes me shumicë dhe pakicë. (thënë ndryshe bordi është mbledhur gati çdo 2 dite nga mbledhja e pare).
- Vetëm në dy raste është aplikuar niveli i reduktuar i akcizës, si një masë shtesë për lehtësimin e çmimeve.
Efekti financiar nga aplikimi i kësaj mase llogaritet në rreth 37 milionë lekë të ardhura të munguara nga akciza, një kosto e përballueshme për buxhetin, në funksion të mbrojtjes së qytetarëve”, tha Malaj.
Ministri i Financave gjatë fjalës së tij solli në vëmendje edhe masat fiskale të marra nga shtetet europiane dhe vendet e Ballkanit Perëndimor për ulje të akcizës.
“Edhe vende të Bashkimit Europian dhe të rajonit, morën masa të ngjashme, përmes zbatimit të paketave lehtësuese e monitoruese.
Po ju sjell disa shembuj:
Italia ndërmori reduktimin e akcizës me rreth 20 cent/litër për naftën dhe me rreth 5 cent/litër për benzinën.
Greqia vendosi tavan për marzhin e lejuar në 12 cent/litër ndaj çmimit final për konsumatorët dhe 5 cent për litër për grosistët.
Serbia ndoqi një qasje më ndërhyrëse dhe të centralizuar. Përcaktoi çmime maksimale të detyrueshme për shitjen me pakicë të naftës dhe benzinës. Si dhe reduktim të përkohshëm të akcizës deri në rreth 20% për të zbutur çmimin final.
Maqedonia e Veriut ndërmori ulje të akcizës me 1–4 denar për litër, në varësi të çmimeve të bursave ndërkombëtare.
Mal i Zi po zbaton reduktim të akcizës deri në 25% për periudha të caktuara.
Pra, këto shembuj na tregojnë se edhe Shqipëria është në linjë me praktikat europiane dhe ka zgjedhur një qasje të balancuar”, pohoi ai ndër të tjera.
Postimi ” Ulja e akcizës te nafta me 20%, Malaj: Masa është përdorur dy herë, efekti në buxhet 37 milionë lekë ” eshte marre nga Revista Monitor.
