Elisabeta Dosku/
Bizneset në vend përballen me masa administrative nëse nuk respektojnë legjislacionin e punës në fuqi, kur ky fakt del na pah jo vetëm nga inspektimet rutinë por edhe nga ankesat që depozitojnë punonjësit.
Referuar të dhënave zyrtare të Inspektoratit Shtetëror të Punës dhe Shërbimeve Shoqërore, rezulton se përgjatë periudhë janar-korrik 2024, janë ndërmarrë 261 inspektime më shumë për respektimin e standardeve të punës sipas legjislacionit në fuqi nga bizneset apo me një rritje prej 4.6% krahasuar me një vit më parë.
Të dhënat tregojnë se inspektimet për ankesat janë rritur me 31%, ku 63% prej tyre rezultuan me masa administrative si pezullim, paralajmërim apo gjobë për bizneset që kanë kryer shkelje në “kurriz” të punonjësve të tyre.
Informaliteti gjithashtu vijon të jetë një shqetësim që rëndon mbi fuqinë punëtore, pasi shpesh detyrohen të punojnë të pa deklaruar, duke humbur kështu çdo lloj përfitimi që vjen nga të qenit pjesë e sistemit tatimor.
Punëmarrësit informalë të identifikuar gjatë proceseve inspektuese rezultojnë në rritje krahasuar me të njëjtën periudhë të një viti më parë në masën 52 %.
Konkretisht janë 1,524 punëmarrës informal të futur në skemë gjatë procesit inspektues nëpërmjet marrjes së masës urgjente “Pezullim Aktiviteti” duke dhënë kontribut për sigurime shoqërore dhe shëndetësore minimalisht + 17 milionë lekë në muaj pas deklarimit në buxhet.
Sipas të dhënave zyrtare, 33% e inspektimeve kanë përfunduar me masa administrative, +24% inspektime më shumë krahasuar me 2023.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
