Më shumë se 100 aktivistë hynë me forcë të premten në kantierin ku po ndërtohet një qendër të dhënash e Microsoft në Amsterdam, në kuadër të një vale protestash që prej dy ditësh po zhvillohen në shkallë globale kundër rritjes së shpejtë të kapaciteteve kompjuterike që kërkon inteligjenca artificiale.
Sipas koalicionit "Stop Dirty Data Centres", që bashkon organizata mjedisore dhe grupe që bëjnë fushata për të drejtat dixhitale, aksione janë paralajmëruar në 16 vende gjatë kësaj fundjave.
Vinça, tullumbace dhe pankarta
Në Amsterdam, protestuesit u ngjitën në vinçat e kantierit, varën tullumbace dhe kërcyen, ndërsa policia ndiqte situatën nga afër. Disa prej tyre mbanin pankarta me mbishkrimin: "Shkatërrojeni qendrën tuaj të të dhënave".
"Këto qendra të dhënash po e shkatërrojnë botën. Kjo është arsyeja pse jemi këtu sot", deklaruan protestuesit.
Në kalendarin e aksioneve të tjera përfshihen një marshim në Dublin, një protestë para ndërtesës së parlamentit në Varshavë dhe një demonstratë kundër një tjetër qendre të dhënash të Microsoft në Danimarkë.
Kundërshtim në rritje edhe jashtë Evropës
Reagimet kundër këtyre investimeve po shtohen nga Spanja deri në Indi dhe Shtetet e Bashkuara. Në SHBA, aksionet e kompanive teknologjike pësuan rënie të ndjeshme të enjten, për shkak të shqetësimit se kontrolli i Kongresit nga demokratët mund të sjellë rregullore më të rrepta që frenojnë bumin e inteligjencës artificiale.
Aktivistët argumentojnë se qendrat e të dhënave rëndojnë furnizimin me energji elektrike dhe ujë, konkurrojnë me strehimin dhe me bizneset e tjera për burime të kufizuara dhe vënë në rrezik objektivat klimatike. Ata paralajmërojnë gjithashtu për humbje vendesh pune dhe për rreziqe ndaj sigurisë personale e kombëtare, si pasojë e përqendrimit të pushtetit në duart e kompanive private dhe gjigantëve të teknologjisë.
