Qendrat e të dhënave janë kthyer në shënjestra kryesore ushtarake dhe sulmet me dronë në luftën në Ukrainë duhet ta shtyjnë Europën të rishqyrtojë vendet ku ngre infrastrukturën e saj të inteligjencës artificiale. Ky është paralajmërimi i Mehdi Paryavi, këshilltar në Kombet e Bashkuara dhe themelues i grupit të ekspertëve të Autoritetit Ndërkombëtar të Qendrave të të Dhënave (IDCA).
Goditje nga të dyja palët
Gjatë javëve të fundit, Rusia ka sulmuar qendra të të dhënave në Kiev, ndërsa dronët ukrainas kanë goditur disa objekte të ngjashme në territorin rus. Kievi i ka paraqitur këto sulme si operacione të drejtuara ndaj vendeve që sigurojnë burime të ardhurash për makinerinë luftarake të Moskës.
Sipas Paryavit, ndërsa shoqëritë bëhen gjithnjë e më të dixhitalizuara, nxjerrja jashtë funksionit e një qendre të dhënash mund të sjellë "paralizimin e funksioneve të ushtrisë, kujdesit shëndetësor dhe financave".
Pse kanë rëndësi këto objekte
Qendrat e të dhënave janë ambientet fizike ku kompanitë vendosin serverat dhe të dhënat e tyre. Ato janë po ashtu thelbësore për inteligjencën artificiale, pasi sigurojnë sasitë e mëdha të energjisë që kjo teknologji kërkon. Rëndësia e tyre rritet ndjeshëm në kohë lufte, duke qenë se Ukraina e përdor inteligjencën artificiale për shënjestrimin e dronëve dhe për qëllime të tjera ushtarake.
Fshehtësia nuk mjafton më
Paryavi thotë se kthimi i qendrave të të dhënave në objektiv ushtarak duhet t'i bëjë shtetet më të kujdesshme në zgjedhjen e vendndodhjes së tyre. Megjithatë, ai argumenton se rekomandimi tradicional i industrisë, që vendet të zgjidhen me kujdes dhe vendndodhja të mbahet e fshehtë, mund të mos jetë më i mjaftueshëm.
“Ndërtimi i qendrave të të dhënave dhe qendrave dixhitale është e vetmja mënyrë që një komb mund të sigurojnë veten”, tha eksperti.
Investimi në këto infrastruktura është i konsiderueshëm: një qendër të dhënash mund të kushtojë deri në 25 miliardë dollarë, ndërsa ndërtimi i saj mund të zgjasë deri në tre vjet.
