Autoriteti Rrugor Shqiptar (ARRSH) ka firmosur kontratën për rikonstruksionin e lotit 2 të rrugës së vjetër Kombinat – Ndroq – Plepa, duke hapur rrugën për fillimin e punimeve në një segment tjetër të këtij aksi. Kontrata u lidh me kompaninë “Albavia” dhe vlera e saj është 918.6 milionë lekë me TVSH, ose 765.5 milionë lekë pa TVSH.
Segmenti që do të rikonstruktohet shtrihet në rreth 4.9 km, ndërsa afati i zbatimit të kontratës është parashikuar 24 muaj. Ndërhyrja është pjesë e projektit për përmirësimin e kësaj rruge, e cila lidh Tiranën me Durrësin dhe shërben si alternativë ndaj autostradës.
Fituesi për lotin 3
Paralelisht, ka ecur përpara edhe procedura për lotin 3. Fituese është shpallur kompania “G.P.G. Company”, me një ofertë prej rreth 950.3 milionë lekësh. Kjo shumë rezulton rreth 30.4% më e ulët se fondi limit, i cili ishte afërsisht 1.36 miliardë lekë. Gjatësia e segmentit ku parashikohet ndërhyrja në këtë lot është rreth 4.35 km.
Loti 1 në fazë më të avancuar
Më përpara se dy lotet e tjera është loti 1, ku punimet kanë nisur në fund të vitit 2024. Kontrata për këtë pjesë është nënshkruar me bashkimin e operatorëve “Arifaj” dhe “Eurokos Holding”, me vlerë rreth 567.8 milionë lekë pa TVSH.
Rruga Kombinat – Ndroq – Plepa ka një gjatësi totale prej rreth 28 km dhe përbën një aks alternativ që lidh kryeqytetin me Durrësin dhe zonat jugore të vendit. Me rikonstruksionin synohet përmirësimi i kushteve të qarkullimit, rritja e sigurisë rrugore dhe lehtësimi i lëvizjes për banorët dhe automjetet që e përdorin këtë rrugë.
