Tregu i sigurimeve në Shqipëri mbetet thellësisht i përqendruar në kryeqytet. Qarku i Tiranës gjeneron rreth 63% të primeve të shkruara bruto në vend, me një vlerë prej 17.1 miliardë lekësh, njëkohësisht duke qenë edhe zona ku kompanitë e sigurimit paguajnë dëmet më të mëdha.
Të dhënat për primet dhe dëmet e paguara sipas qarqeve tregojnë se gati dy të tretat e parave që shpenzohen për sigurime vijnë nga Tirana, një peshë më e lartë krahasuar me vitin e kaluar. Edhe në anën e dëmeve, kryeqyteti mban barrën kryesore, me afro 66% të totalit të paguar nga kompanitë.
Durrësi i dyti, qarqet e tjera larg
Në vendin e dytë renditet Durrësi, që përfaqëson rreth 6.6% të primeve në shkallë kombëtare, ose afro 1.8 miliardë lekë. Ky qark zë gjithashtu rreth 8% të dëmeve të paguara.
Në pjesën tjetër të vendit, pesha e primeve bie ndjeshëm. Korça përbën rreth 4.7% të totalit, Fieri 4.5%, ndërsa Vlora rreth 4.2%.
Çfarë tregojnë shifrat
Këto përqindje pasqyrojnë vlerën e tregut të sigurimeve në çdo qark dhe jo domosdoshmërisht sa banorë janë të siguruar. Dallimet mes qarqeve mund të shpjegohen me numrin e popullsisë, të automjeteve, bizneseve dhe pronave, si dhe me vlerën e policave të sigurimit.
Primet janë pagesat që qytetarët dhe bizneset kryejnë për t’u siguruar, ndërsa dëmet përfaqësojnë shumat që kompanitë paguajnë kur ndodh një ngjarje e mbuluar nga kontrata.
