Pamjet e ditës pas protestës në Tiranë tregojnë dëme të dukshme në disa godina institucionale dhe biznese në qendër të kryeqytetit. Te Gjykata e Lartë dallohen mure të nxira, një fasadë e shkrumbuar dhe një skelet hekuri i ekspozuar, ndërsa te zyrat e Bankës së Shqipërisë në ish-hotel 'Dajti' dera kryesore, e shpërthyer nga protestuesit dhe më pas e përfshirë nga flakët, është krejtësisht e nxirë.
Gjykata e Lartë, zjarri rrezikoi ndërtesën
Zjarri që protestuesit i vunë godinës së Gjykatës së Lartë mori përmasa të mëdha dhe vuri në rrezik vetë ndërtesën. Në pjesën e përfshirë nga flakët nuk ka mbetur gjë tjetër përveç tavanit të shembur dhe një grumbulli materialesh të ngurta.
Xhamat e dritareve në katin e parë janë thyer, pasi protestuesit i përdorën këto pika për të hedhur molotovë të tjerë brenda zyrave. Nga hapësirat mes dritareve duket se dëmi në këtë pjesë është disi më i kufizuar, por shkalla e tij do të përcaktohet vetëm pas një vlerësimi të qartë.
Dëme edhe në biznese dhe në një bankë të nivelit të dytë
Një biznes ngjitur, që i përket një kompanie celulare, ka pësuar dëme në fasadën e sipërme, ku pjesa prej xhami është thyer. Megjithatë, protestuesit nuk duket të kenë tentuar ta hapin qepenin me forcë, ndryshe nga ç'ndodhi në një pikë tjetër të të njëjtit operator, në hyrje të "Rrugës së Dibrës", ku plaçkitën gjithçka që mundën.
Në rrugën "Myslym Shyri", filiali i një banke të nivelit të dytë, ku gjithashtu u shkaktua zjarr, ka dëmtime të ngjashme.
Selia 2 e Bankës së Shqipërisë
Te zyrat e Bankës së Shqipërisë në ish-hotel 'Dajti', përveç derës kryesore të djegur, janë shkatërruar edhe grilat e dritareve. Të thyera janë xhamat e dritareve, të disa dyerve, si dhe ata të kabinës së rojes.
