ASHK arkëtoi 4.2 miliardë lekë nga pronat në 2025, plani u tejkalua me 52%

Agjencia Shtetërore e Kadastrës (ASHK) mbylli vitin 2025 me të ardhura prej 4.2 miliardë lekësh, ose rreth 46 milionë euro, nga shërbimet që lidhen me pronat. Shifra e kalon planin vjetor me rreth 1.46 miliardë lekë, çka përkthehet në një realizim prej 152%.

Krahasuar me vitin 2024, të ardhurat e institucionit u shtuan me rreth 1.1 miliardë lekë, që përbën një rritje vjetore prej afërsisht 35%, sipas të dhënave zyrtare të publikuara nga ASHK.

Regjistrimi i pronave, burimi kryesor

Pjesa më e madhe e të ardhurave vjen nga regjistrimi i pronave. Në këtë zë përfshihen tarifat e shërbimeve kadastrale, kamatëvonesat dhe taksa 3% për kalimin e pronësisë. Nga ky burim u mblodhën rreth 3.6 miliardë lekë, ndërkohë që plani parashikonte 2.2 miliardë lekë.

Mbi parashikimet rezultuan edhe të ardhurat nga legalizimet. Për këtë kategori, që përfshin të ardhurat nga parcela ndërtimore, tarifat e shërbimit dhe penalitetet, u arkëtuan 675 milionë lekë, kundrejt një plani prej 550 milionë lekësh, me një nivel realizimi rreth 123%.

Në strukturën e përgjithshme, përveç shërbimeve kadastrale, një peshë të rëndësishme patën edhe të ardhurat nga transferimi i parcelave ndërtimore, që arritën në rreth 422 milionë lekë. Të ardhurat e tjera u regjistruan në 253 milionë lekë.

Drejtoritë me rritjen më të madhe

Në raport me vitin 2024, rritjen më të lartë relative e shënoi Drejtoria e Lushnjës, me 222%, performanca më e mirë në rang kombëtar. Pas saj renditen Lezha, me 191%, si dhe Dibra, Berati dhe Shkodra.

Një grup i dytë drejtorish me rritje të ndjeshme përfshin Tiranën Rurale 1, me 155%, dhe Pogradecin, me 159%, të ndjekura nga Kamëz–Vora, Durrës–Kavajë–Kruja, Saranda, Vlora dhe Tirana Rurale 2.

Jo vetëm efekti i tarifave

ASHK pranon se gjatë vitit 2025 u miratuan ndryshime në tarifat e shërbimeve kadastrale, por thekson se ecuria pozitive e të ardhurave nuk shpjegohet vetëm me rritjen e tyre. Sipas agjencisë, ndikim kanë dhënë edhe faktorë të tjerë, si rritja e volumit të shërbimeve, përmirësimi i eficiencës operacionale dhe kërkesa më e lartë.