Agjencia Shtetërore e Kadastrës (ASHK) ka nisur përgatitjen e një harte të re të vlerës së tokës, duke u mbështetur në analizën e 33,582 transaksioneve të shitblerjes së tokës të regjistruara gjatë periudhës janar 2017–nëntor 2025. Procesi ka filluar gjatë vitit 2025 dhe përfshin pasuri të paluajtshme në të gjithë territorin e vendit.
Puna kryhet nga Sektori i Analizës dhe Vlerësimit të Pasurive pranë ASHK-së, i cili është marrë me mbledhjen, administrimin dhe përpunimin e të dhënave për kalimin e pronësisë nëpërmjet kontratave të shitjes. Qëllimi është të përcaktohet niveli i vlerës së tokës për secilën zonë kadastrale.
Mbi 8.5 mijë transaksione vetëm në vitin 2025
Sipas të dhënave të institucionit, gjatë vitit 2025 janë krijuar gjithsej 8,564 rekorde transaksionesh për shitjen e pasurive të paluajtshme të llojit tokë. Prej tyre, 2,226 rekorde lidhen me periudhën 1 nëntor–31 dhjetor 2024, ndërsa 6,338 të tjera mbulojnë periudhën 1 janar–31 tetor 2025.
Shpërndarja sipas llojit të tokës tregon se tregu dominohet nga toka bujqësore, e ndjekur nga trualli:
- Tokë bujqësore: 6,518 rekorde
- Tokë truall: 1,813 rekorde
- Tokë pyjore: 130 rekorde
- Tokë kullosore: 103 rekorde
Metodologjia dhe burimi i të dhënave
Këto informacione përbëjnë bazën për analizën e tregut dhe për llogaritjen e nivelit të vlerës së pasurive të paluajtshme në zonat kadastrale ku ka të dhëna për shitblerje. Vlerësimi kryhet në përputhje me vendimin nr. 658 të vitit 2012 “Për Miratimin e Metodologjisë për Vlerësimin e Pronave të Paluajtshme në Republikën e Shqipërisë”.
Për përcaktimin e vlerave, ASHK ka përfshirë në llogaritje të dhënat e administruara për gati nëntë vjet, nga janari 2017 deri në nëntor 2025. Informacioni është marrë nga sistemi informatik i pasurive të paluajtshme dhe bazohet në të dhënat zyrtare të regjistrit kadastral, të cilin e administrojnë drejtoritë dhe zyrat vendore të agjencisë.
Në zonat kadastrale ku nuk ekzistojnë të dhëna për transaksione shitblerjeje, ASHK ka vendosur të ruajë vlerat e përcaktuara në hartën e mëparshme të vlerës së tokës, të miratuar nga Këshilli i Ministrave.
Referencë për tregun e pronave
Synimi i procesit është ngritja e një baze të përditësuar vlerësimi, e mbështetur te çmimet reale të transaksioneve, me llogaritje të nivelit të vlerës për çdo zonë kadastrale ku informacioni është i disponueshëm.
Përcaktimi i vlerave të reja ka rëndësi të veçantë për tregun e pasurive të paluajtshme, pasi niveli i vlerës për zonat kadastrale përdoret si pikë referimi në vlerësimin e pronave.
