Individët dhe bizneset në Shqipëri kanë kursyer rreth 177 milionë euro falë uljes së tarifave tatimore për pasuritë e paluajtshme, si pasojë e procesit të rivlerësimit me normë 5%. Të dhënat e Drejtorisë së Përgjithshme të Tatimeve mbulojnë periudhën nga prilli, kur ligji hyri në zbatim, deri në tetor.
Gjatë këtyre muajve, përfituesit e rivlerësimit me 5% kanë shmangur pagesën e afro 177 milionë eurove në buxhet, duke ulur kostot e tyre fiskale dhe duke shfrytëzuar lehtësitë ligjore në fuqi. Sipas të njëjtave të dhëna, interesi i qytetarëve për këtë nismë mbetet i lartë.
Pritshmëri për të ardhura më të larta se në 2022
Në procesin e mëparshëm të rivlerësimit, në vitin 2022, të ardhurat e arkëtuara arritën në 5.6 miliardë lekë. Duke u nisur nga kjo shifër, qeveria parashikon që të ardhurat nga ky zë, në mbyllje të procesit aktual, të jenë edhe më të larta.
Afatet dhe kush mund të përfitojë
Ligji u jep qytetarëve të drejtën të rivlerësojnë pasuritë e tyre të paluajtshme me një normë tatimore prej 5%. Afati për kryerjen e rivlerësimit përfundon më 31 dhjetor 2026. Megjithatë, kërkesat e dorëzuara pranë Agjencisë Shtetërore të Kadastrës (ASHK), për të cilat tatimi është paguar, por procedurat administrative nuk janë përmbyllur nga ASHK brenda kësaj date, do të konsiderohen objekt rivlerësimi sipas ligjit. Për to, procedurat administrative do të përfundojnë deri më 31 mars 2027.
Ligji parashikon të drejtën e rivlerësimit edhe për personat juridikë, të cilët kanë të regjistruar në pasqyrat financiare pasuri të paluajtshme me vlerë më të ulët se ajo e tregut. Ata mund t’i rivlerësojnë këto pasuri me vlerën e tregut brenda datës 31 dhjetor 2026.
Rivlerësimi mund të kryhet nga një ekspert i licencuar për vlerësimin e pasurive të paluajtshme nga institucionet përkatëse, ose nga drejtoritë vendore të Agjencisë Shtetërore të Kadastrës.
