Të ardhurat nga rivlerësimi i pasurive të paluajtshme kanë arritur nivele rekord, duke tejkaluar që në nëntë muajt e parë të vitit 2026 shifrën e regjistruar për të gjithë vitin 2025, i cili deri tani konsiderohej viti më i mirë historik. Sipas të dhënave të publikuara nga sektori, në arkën e shtetit janë mbledhur rreth 8.3 miliardë lekë, ose afërsisht 90 milionë euro.

Megjithatë, Drejtori Ekzekutiv i NAREA-s, Reinaldo Pipiria, paralajmëron se kjo shifër nuk duhet lexuar domosdoshmërisht si shenjë e aktivitetit të ri ekonomik. Sipas tij, një pjesë e konsiderueshme e këtyre të ardhurave janë detyrime të arkëtuara me vonesë, të cilat duhej të ishin pasqyruar në buxhet në vitet e kaluara.

Një "aktiv i vonuar" për buxhetin

Pipiria shpjegon se shumë prej pronave të rivlerësuara do të duhej të ishin reflektuar shumë më herët në kartelat e pasurisë. Kjo ndodh, sipas tij, në momentin kur kontrata e porosisë shndërrohet në kontratë përfundimtare shitjeje dhe regjistrohet në ASHK, gjë që ndikon edhe në taksimin e pasurisë.

“Për të ardhur te rivlerësimi nëntë muajt e 2026-ës, kanë ë diku te 8.3 miliardë lekë të arkëtuara në arkën e shtetit, pra diku te 90 milionë euro, kanë te kaluar vitin më të mirë historik që është 2025-a. Pra nëntë muajt e 2026-ës kanë te kaluar 2025-ës. Realisht shteti ka marrë lekët që duhet të kishte marrë në 2023, 2024, 2025 edhe ditën e sotme. Pra është realisht aktiv i vonuar.”

Ai shtoi se ekzistojnë shumë dinamika që mbeten të paqarta për vitin 2027.

Argumentet për shtyrjen e afatit

Drejtori i NAREA-s mbështet idenë që procesi i rivlerësimit të shtyhet në vitin 2027. Sipas tij, një ekuilibër më i mirë mes kërkesës dhe ofertës do të shmangte rritjet e forta të çmimeve, do të ruante një ecuri më të qëndrueshme të tregut dhe, njëkohësisht, do të sillte më shumë të ardhura për buxhetin.

Pipiria thekson se kërkesa pritet të forcohet, ndër të tjera, falë kredive të buta, subvencionimit të interesave të kredisë dhe subvencionimit të qirasë. Në këtë kontekst, një ofertë e shtuar do të ecte paralelisht me kërkesën.

“Pra realisht të dyja do shkonin paralelisht, një rritje e kërkesës me një ofertë e cila vjen e rritur, do të kishim ë një stabilitet në në treg, me çmime ekonomike. Pra reflektime, rritje të çmimeve jo dyshifrore, por mjaftueshëm për inflacionin dhe pak pak më tepër për të dhënë sinjale pozitive në ë në në treg. Do të kishim para më tepër në arkën e shtetit.”

Sipas tij, me një rivlerësim të shtyrë, tregu do të vazhdonte të prodhonte dhe të ofronte banesa me çmime të përballueshme.

Vendim kyç për tregun imobiliar

Në këtë kuadër, vendimi për rivlerësimin e pronave në vitin 2027 shihet si një nga faktorët që do të përcaktojnë jo vetëm nivelin e të ardhurave buxhetore, por edhe ritmin e zhvillimit të tregut imobiliar dhe përballueshmërinë e çmimeve të banesave për qytetarët.