Atraksionet që njerëzit i kanë në listën e ëndrrave nuk përmbushin gjithmonë pritshmëritë. Një studim që analizoi gati 100 mijë komente për 200 atraksione të mëdha zbuloi destinacionet që kanë më shumë gjasa t’i lënë vizitorët të zhgënjyer, me ankesa që variojnë nga turmat dhe çmimet e larta, te përvoja që thjesht nuk e justifikon famën.
Nga monumentet ikonike te parqet tematike me famë botërore, disa atraksione premtojnë përvoja të paharrueshme, por jo gjithmonë për arsyet e duhura.
Një studim i ri, që analizoi gati 100 mijë komente vizitorësh, ka zbuluar atraksionet turistike që kanë më shumë gjasa t’i lënë udhëtarët të zhgënjyer. Për të dytin vit radhazi, në krye të listës është renditur një destinacion i njohur britanik.
Ankesat për turmat, çmimet jo të arsyeshme dhe përvojat që nuk përmbushin pritshmëritë kanë bërë që disa prej emrave më të njohur në botë të marrin vlerësime negative.
Sipas studimit të Radical Storage, vendi më zhgënjyes rezulton të jetë Alton Towers në Angli, i ndjekur nga Georgia Aquarium dhe Horseshoe Casino, të dyja në Shtetet e Bashkuara.
Si u përpilua renditja?
Duke u nisur nga një listë prej 5,832 atraksionesh turistike në 50 nga vendet më të vizituara në botë, bazuar në raportet e EuroMonitor dhe Mastercard, studiuesit e Radical Storage e ngushtuan përzgjedhjen duke përjashtuar atraksionet që kishin më pak se 2,000 komente nga vizitorët.
Atraksionet në Rusi, Ukrainë dhe Izrael u përjashtuan nga studimi për shkak të konflikteve të vazhdueshme. Pas këtij filtrimi, ekspertët analizuan 99,547 komente vizitorësh.
Për të krijuar renditjen, ekipi përdori 90 fjalë kyçe që shfaqeshin më shpesh në përshkrimet e vizitorëve. U përjashtuan rastet që mund të krijonin keqkuptime, si fraza “jo zhgënjyese”, ndërsa fokusi u vendos te terma si “i mërzitshëm” dhe “i paarritshëm”. Më pas u llogarit përqindja e komenteve negative për secilin atraksion.
Mesatarisht, 5.2% e komenteve për atraksionet e studiuara ishin negative, por disa destinacione kishin përqindje dukshëm më të larta.
Studimi zbuloi gjithashtu se Britania e Madhe dhe Kanadaja janë vendet me përqindjen më të lartë të atraksioneve zhgënjyese (7.9%), të ndjekura nga Shtetet e Bashkuara (7.5%).
Ndër qytetet, më zhgënjyeset rezultuan të jenë Seattle (8.9%), Budapesti (6.3%), Londra dhe Bangkoku (nga 6%). Po ashtu, gjashtë nga dhjetë atraksionet më zhgënjyese në botë ndodhen në Amerikën e Veriut.
Atraksioni më zhgënjyes në botë
Alton Towers në Britaninë e Madhe u rendit për të dytin vit radhazi si atraksioni turistik më zhgënjyes në botë.
Mbi një e treta e komenteve (38.2%) raportojnë përvoja negative, ku ankesat më të zakonshme lidhen me mbipopullimin dhe raportin e dobët cilësi-çmim.
Alton Towers regjistroi gjithashtu përqindjen më të lartë të komenteve që ankoheshin për vlerën e ulët kundrejt çmimit: 15%, krahasuar me mesataren prej vetëm 1.3% në të gjithë studimin.
Nuk janë lojërat ato që zhgënjejnë më shumë vizitorët në Alton Towers, por shërbimi ndaj klientit, informacionet që duken çorientuese për biletat dhe kostot shtesë për ushqim, pije apo akses në zona të ndryshme të parkut.
Megjithatë, për parkun më të madh tematik në Britani ka edhe një lajm pozitiv: vitin e kaluar 49.4% e komenteve ishin negative, ndërsa këtë vit kjo shifër ra në 38.2%.
Georgia Aquarium në Atlanta, SHBA, renditet si atraksioni i dytë më zhgënjyes. Edhe pse është shtëpia e dhjetëra mijëra krijesave detare, 19.6% e komenteve përmbanin fjalë negative.
Sipas studimit, 10% e vizitorëve u ankuan për mbipopullim ose probleme me aksesin, ndërsa 6.2% menduan se përvoja nuk ia vlente paratë.
Horseshoe Casino në Louisiana, SHBA, renditet gjithashtu ndër atraksionet më zhgënjyese. Edhe pse ofron lojëra tavoline, automate, poker dhe disa mundësi ushqimi, 18.6% e vizitorëve lanë komente për përvoja negative.
Në 16.6% të komenteve u përdorën fjalë si “i mërzitshëm”, “i amortizuar”, “i mbivlerësuar” dhe “ka nevojë për restaurim”, çka sugjeron se atraksioni nuk përmbush pritshmëritë.
Széchenyi Baths and Pool në Budapest, banja më e madhe mjekësore në Evropë, është një destinacion ëndrrash për shumë turistë. Megjithatë, sipas studimit, 16.6% e vizitorëve që lanë komente raportuan një përvojë negative.
Te Széchenyi Baths në Budapest, problemet kryesore ishin mbipopullimi dhe aksesi. Këto u përmendën në 7.2% të komenteve, krahasuar me mesataren 2.1%.
Ripley’s Aquarium of Canada në Toronto renditet gjithashtu ndër atraksionet më zhgënjyese. Edhe pse ka mbi 20 mijë kafshë ujore dhe ekspozita interaktive, 16% e vizitorëve lanë komente negative.
Ankesa kryesore ishte mbipopullimi: 9.6% e komenteve e përmendnin këtë problem. Ndërsa 5% e vizitorëve mendonin se akuariumi nuk ia vlente paratë.
Top 10 atraksionet më zhgënjyese:
- Alton Towers, Britani e Madhe – 38.2%
- Georgia Aquarium, SHBA – 19.6%
- Horseshoe Casino, SHBA – 18.6%
- Széchenyi Baths, Hungari – 16.6%
- Ripley’s Aquarium of Canada – 16%
- Universal Islands of Adventure, SHBA – 15.6%
- Siam Park, Spanjë – 13.4%
- Space Needle, SHBA – 12.6%
- Graceland, SHBA – 12.6%
- Fushimi Inari-taisha Shrine, Japoni – 12%. /Euronews
Postimi ” Atraksionet turistike më zhgënjyese në botë ” eshte marre nga Revista Monitor.
