Zëvendësguvernatorja e Dytë e Bankës së Shqipërisë, Natasha Ahmetaj, zhvilloi një takim zyrtar me Zëvendëspresidentin e Bankës Evropiane të Investimeve (BEI), Robert de Groot. Në fokus të bisedës ishte intensifikimi i bashkëpunimit ndërmjet dy institucioneve për të mbështetur objektivat e zhvillimit të qëndrueshëm dhe procesin e integrimit evropian të vendit.

Në këtë takim morën pjesë gjithashtu Alessandro de Concini, përfaqësues i BEI-t në Shqipëri, Kristina Slaveykova, këshilltare e Zëvendëspresidentit, si dhe zyrtarë të tjerë nga Banka e Shqipërisë. Gjatë bisedimeve, zëvendësguvernatorja Ahmetaj prezantoi ecurinë e ekonomisë shqiptare dhe perspektivat e saj, duke u mbështetur te të dhënat dhe parashikimet më të fundit të bankës qendrore.

Palët trajtuan mundësitë e zgjerimit të partneritetit në fushën e financës së qëndrueshme, orientimin e investimeve drejt nismave me ndikim pozitiv në mjedis dhe rritjen e qëndrueshmërisë së sistemit financiar shqiptar. U vu theksi te rëndësia e bashkëpunimit përballë sfidave klimatike dhe mbështetjes së tranzicionit drejt një ekonomie më të gjelbër dhe konkurruese, konform standardeve të Bashkimit Evropian dhe objektivave kombëtarë.

Zëvendësguvernatorja Ahmetaj vlerësoi lart rolin e BEI-t si partner strategjik në përmbushjen e këtyre synimeve, duke theksuar se bashkëpunimi ndërinstitucional krijon mundësi për forcimin e kapaciteteve dhe integrimin e kritereve mjedisore e klimatike në sektorin financiar. Ajo vlerësoi përfundimin e draftit të Taksonomisë Kombëtare të Gjelbër, në kuadër të Programit të Asistencës Teknike për Sistemet Financiare të Gjelbra, si një fillim të mbarë. Instrumenti do të ndihmojë në orientimin e financimit drejt veprimtarive të qëndrueshme ekonomike dhe në rritjen e transparencës për investitorët dhe institucionet financiare.

Nga ana e tij, Zëvendëspresidenti de Groot çmoi përpjekjet e Shqipërisë për kalimin drejt një modeli ekonomik të gjelbër dhe forcimin e rezistencës ndaj ndryshimeve klimatike. Ai u shpreh se BEI, në rolin e bankës së klimës të Bashkimit Evropian dhe si një prej investitorëve kryesorë në financën e gjelbër, pret që ky bashkëpunim të ndihmojë zhvillimin e qëndrueshëm ekonomik dhe përgatitjen e vendit për anëtarësim në Bashkimin Evropian.

Në përfundim të takimit, zëvendësguvernatorja Ahmetaj shprehu mirënjohjen për mbështetjen e vazhdueshme të Bankës Evropiane të Investimeve. Të dyja palët rikonfirmuan vullnetin për të vijuar dhe zgjeruar bashkëpunimin në fushat me interes të përbashkët.