Transfertat në lekë dhe në euro në Shqipëri do të mund të kryhen pa ndërprerje, 24 orë në ditë, 7 ditë në javë, gjatë gjithë vitit, dhe do të përfundojnë brenda një kohe maksimale prej 10 sekondash nga momenti kur ofruesi i shërbimeve të pagesave të dërguesit e pranon urdhrin. Kjo bëhet e mundur pasi Banka e Shqipërisë, në mbledhjen e saj të fundit, miratoi paketën rregullative për funksionimin e sistemit të pagesave të menjëhershme IPSA, si dhe të sistemeve të pagesave AIPS, AIPS EURO dhe AECH.

Katër rregullore për sistemet e pagesave

Paketa e miratuar nga banka qendrore përmban katër rregullore të veçanta:

  • “Për funksionimin e Sistemit të pagesave të menjëhershme – IPSA”;
  • “Për funksionimin e Sistemit të pagesave ndërbankare me vlerë të madhe – AIPS”;
  • “Për funksionimin e Sistemit AIPS EURO për shlyerjen e transfertave vendase për klientë në Euro”;
  • “Për funksionimin e Sistemit të klerimit të pagesave me vlerë të vogël – AECH”.

Me këtë hap, krijohet kuadri rregullator që i hap rrugë funksionimit të sistemit IPSA, ndërkohë që kuadri i sistemeve ekzistuese përshtatet me zhvillimet e reja që po ndodhin në tregun e pagesave.

Projekt rajonal me mbështetjen e Bankës së Italisë

Vënia në zbatim e sistemit IPSA është pjesë e një projekti të përbashkët të pesë bankave qendrore të Ballkanit Perëndimor, mes të cilave edhe Banka e Shqipërisë. Infrastruktura teknologjike dhe mbështetja operacionale sigurohen nga Banka e Italisë, ndërsa sistemi ndjek modelin e Sistemit evropian të pagesave të menjëhershme TIPS.

Rregulloret e reja përcaktojnë mënyrën e funksionimit të sistemeve, si dhe të drejtat e detyrimet e pjesëmarrësve. Ato krijojnë mundësinë që sistemi i ri të ndërlidhet me infrastrukturat ekzistuese dhe reflektojnë ndryshimet ligjore që zgjerojnë rrethin e pjesëmarrësve në sistemet e pagesave të operuara nga Banka e Shqipërisë, me synimin e përafrimit me kuadrin e Bashkimit Evropian.

Sipas bankës qendrore, këto zhvillime në tërësi ndihmojnë në modernizimin e tregut shqiptar të pagesave, në nxitjen e përdorimit të pagesave elektronike, në formalizimin e ekonomisë dhe në thellimin e integrimit financiar të Shqipërisë me Bashkimin Evropian.

Kufij për tarifat e shkëmbimit në pagesat me kartë

Në të njëjtën mbledhje, Banka e Shqipërisë miratoi edhe rregulloren “Për tarifat e shkëmbimit për transaksionet e pagesave të bazuara në kartë”. Qëllimi i saj është ndërtimi i një tregu më efikas, më konkurrues dhe më transparent të pagesave me kartë, në linjë me objektivat e integrimit evropian dhe me zhvillimin e tregut vendas të pagesave.

Rregullorja trajton tarifat e shkëmbimit (interchange), të cilat janë një pjesë e rëndësishme e kostos që përballojnë tregtarët kur pranojnë pagesa me kartë. Duke vendosur kufij rregullatorë për këto tarifa, banka qendrore synon të ulë kostot e pranimit të kartave dhe të krijojë kushte më të përshtatshme për përhapjen e tyre.

Kostot më të ulëta pritet të inkurajojnë më shumë tregtarë që të pranojnë pagesa me kartë, duke u dhënë konsumatorëve më shumë mundësi për të përdorur pagesat elektronike si një alternativë më efikase dhe më të sigurt ndaj parasë fizike. Në të njëjtën kohë, rregullorja synon të forcojë konkurrencën në tregun e pagesave dhe të rrisë transparencën e tarifave për përdorimin e instrumenteve të pagesës.

Me miratimin e kësaj rregulloreje, Banka e Shqipërisë përmbush një nga detyrimet e saj institucionale në kuadër të procesit të integrimit evropian, duke dhënë njëkohësisht kontribut në modernizimin e tregut shqiptar të pagesave.