Ministri për Evropën dhe Punët e Jashtme, Ferit Hoxha, zhvilloi në Bukuresht një takim me Daniel-Cătălin Zamfir, Ministër i Ekonomisë, Digjitalizimit, Sipërmarrjes dhe Turizmit të Rumanisë. Në qendër të bisedës ishin mënyrat për t’i kthyer marrëdhëniet shumë të mira politike mes dy vendeve në një bashkëpunim ekonomik më të thellë.
Sipas Hoxhës, Shqipëria dhe Rumania kanë ende një potencial të madh që nuk është shfrytëzuar, si për shtimin e shkëmbimeve tregtare dhe tërheqjen e investimeve, ashtu edhe për lidhje më të drejtpërdrejta mes sipërmarrjeve të të dy vendeve.
Fushat me potencial
Pas takimit, kreu i diplomacisë shqiptare shkroi në rrjetin social X: “Identifikuam mundësi premtuese në fushën e Teknologjisë dhe Informacionit, shërbimeve digjitale, industrisë prodhuese dhe turizmit”.
“Prioriteti tani është që këtë potencial ta shndërrojmë në rezultate konkrete, përmes një agjende të dedikuar biznesi për vitin 2027, angazhimit të drejtpërdrejtë B2B dhe partneriteteve që sjellin përfitime të prekshme për të dyja ekonomitë”
Takimet e tjera në Bukuresht
Para këtij takimi, Hoxha u prit edhe nga Ministri i Jashtëm i Rumanisë, Dan Neculăescu, dhe nga Ministri i Investimeve dhe Projekteve Evropiane, Alexandru-Mihai Ghigiu. Bisedat me ta u përqendruan te mbështetja teknike që Rumania mund t’i ofrojë Shqipërisë në procesin e integrimit evropian.
