Bashkimi Europian po përgatit planet për një kabllo të sigurt nënujore që do ta lidhë Groenlandën drejtpërdrejt me kontinentin europian. Synimi është që rrjeti më pas të shtrihet përmes Kanadasë deri në Japoni dhe Korenë e Jugut. Nisma bën pjesë në strategjinë e re të BE-së për Arktikun, rajon që po merr peshë strategjike për shkak të shkrirjes së akullit, rrugëve të reja detare që po hapen dhe tensioneve gjeopolitike në rritje.
Kabllot si çështje sigurie
Me këtë projekt, Brukseli kërkon të përforcojë infrastrukturën digjitale dhe të ndërtojë rrugë alternative për qarkullimin e të dhënave. Kabllot nënujore shihen gjithnjë e më shumë si çështje sigurie, pasi nëpërmjet tyre kalon pjesa më e madhe e të dhënave ndërkombëtare. Ato janë jetike për komunikimet, shërbimet digjitale dhe transaksionet financiare.
Shqetësimet e Europës lidhen me zgjerimin e pranisë ushtarake ruse në Arktik, me rrezikun e sabotimit të infrastrukturës nënujore, si edhe me interesin në rritje të Shteteve të Bashkuara për Groenlandën, territor autonom i Danimarkës.
Fonde të parashikuara, por shumë pikëpyetje
BE-ja ka vënë tashmë mënjanë 107 milionë euro për projekte të lidhjes digjitale ku përfshihet Groenlanda. Megjithatë, për projektin e ri ende nuk ka një itinerar përfundimtar, buxhet të plotë apo afat të caktuar ndërtimi. Të pazgjidhura mbeten edhe çështjet e financimit, të pronësisë dhe të mbrojtjes së kabllove, si dhe forma e bashkëpunimit me Kanadanë dhe partnerët aziatikë.
Monitorim dhe flotë akullthyesesh
Plani parashikon gjithashtu ngritjen e një qendre për monitorimin dhe riparimin e kabllove nënujore në Atlantikun e Veriut dhe në Arktik. Në të njëjtën kohë, BE-ja synon të rrisë kapacitetet detare nëpërmjet bashkëpunimit me vendet nordike dhe zhvillimit të flotës së akullthyeseve, të domosdoshme për lundrimin në ujërat e mbuluara nga akulli.
Nisma dëshmon se për Europën Arktiku nuk është më thjesht një rajon i largët, por një hapësirë gjithnjë e më e rëndësishme për sigurinë, komunikimet dhe interesat ekonomike.
