Banka Qendrore Evropiane (BQE) ka ngritur alarmin për rreziqet që po shtohen mbi ekonominë evropiane, duke identifikuar shtrenjtimin e energjisë dhe pasigurinë rreth financave publike si dy faktorët që mund të ngadalësojnë rritjen ekonomike dhe të nxitin inflacionin.
Në buletinin më të fundit ekonomik, institucioni me seli në Frankfurt nënvizon se nëse kriza energjetike zgjatet dhe thellohet, efektet e saj zinxhir në ekonomi pritet të çojnë në rritje të mëtejshme të çmimeve dhe në dobësim të aktivitetit ekonomik. Në të njëjtën kohë, BQE u kërkon qeverive kujdes në menaxhimin e financave publike.
Inflacioni mbi objektiv
Sipas BQE-së, rritja e papritur e çmimeve të energjisë mund ta mbajë inflacionin e përgjithshëm qartësisht mbi objektivin e institucionit edhe në tremujorët në vijim. Si element pozitiv, banka veçon stabilitetin relativ të inflacionit bazë dhe faktin që nuk shihen shenja të një reagimi të fortë të pagave ndaj shtrenjtimit të çmimeve.
Institucioni konstaton se pritshmëritë për inflacionin në afat të shkurtër janë rritur, ndërsa ato afatgjata qëndrojnë kryesisht pranë objektivit prej 2%.
Shqetësimi për financat publike
Një tjetër burim shqetësimi janë financat publike të vendeve të eurozonës. BQE vlerëson se pasiguria mbi politikat buxhetore mund të shtrëngojë më tej kushtet e financimit, të gërryejë besimin e konsumatorëve dhe të bizneseve dhe të frenojë konsumin e investimet.
Banka u bën thirrje qeverive të ndërmarrin reforma strukturore dhe të ruajnë qëndrueshmërinë e financave publike, duke theksuar se masat kundër krizës energjetike duhet të jenë të përkohshme, të synuara dhe të përshtatura sipas nevojave.
Rritje e moderuar
Pavarësisht pasigurive, BQE gjykon se ekonomia e eurozonës vazhdon të rritet, ndonëse me ritme të moderuara. Institucioni shton se do të ndjekë një qasje të kujdesshme në politikën monetare, pa u angazhuar paraprakisht për një trajektore të caktuar të normave të interesit.
