Qeveria synon që çdo vit rreth 10 000 të rinj të gjejnë punë përmes programeve të tregut të punës, sipas objektivave të përcaktuara në buxhetin afatmesëm. Për vitin 2027 parashikohet punësimi i 9 950 personave të grupmoshës 16-29 vjeç, ndërsa në vitin 2028 shifra synohet të arrijë në 10 000. Për vitin 2029 objektivi rritet në 10 100 të rinj të punësuar.
Qëndrueshmëria e vendeve të punës
Përveç numrit të të punësuarve, buxheti vendos në fokus edhe faktin nëse përfituesit mbeten në punë pasi përfundojnë programet mbështetëse. Pjesa e përfituesve të programeve të nxitjes së punësimit që vazhdojnë të jenë të punësuar synohet të rritet nga 69% në vitin 2026 në 70% në vitin 2027 dhe në 71% gjatë periudhës 2028-2029.
Formimi profesional konsiderohet gjithashtu si një mjet për të lehtësuar hyrjen në tregun e punës. Përqindja e të papunëve që mbeten në punë pas kurseve të formimit profesional parashikohet të rritet nga 67% në vitin 2026 në 68% në vitin 2027, 69% në vitin 2028 dhe 70% në vitin 2029. Njëkohësisht, numri i të papunëve që regjistrohen ose certifikohen në këto kurse synohet të rritet nga 13 300 në vitin 2027 në 13 500 në vitin 2029.
Grupet më të cenueshme
Objektivat përfshijnë edhe zgjerimin e mundësive për grupet që hasin më shumë vështirësi në tregun e punës. Përmes ndërmjetësimit dhe programeve të nxitjes së punësimit, parashikohet punësimi i rreth 520 personave me aftësi të kufizuara në vitin 2027 dhe i rreth 530 personave në secilin prej viteve 2028 dhe 2029.
Vëmendje të veçantë merr punësimi i grave. Deri në vitin 2029 synohet që 71% e grave të papuna të përfshira në programet e nxitjes së punësimit të vazhdojnë të punojnë pas përfundimit të tyre, krahasuar me objektivin prej 69% për vitin 2026.
Për personat që marrin pagesë papunësie, qëllimi është rritja e punësimit përmes ndërmjetësimit dhe programeve mbështetëse. Numri i të punësuarve nga ky grup parashikohet të arrijë në 2 030 në vitin 2027, në 2 040 në vitin 2028 dhe në 2 050 në vitin 2029.
