Sipërmarrës dhe ekspertë të marketingut paralajmëruan se inteligjenca artificiale, ndërsa po u jep bizneseve mundësi të reja për të automatizuar proceset rutinë, po e bën më të vështirë hyrjen e të rinjve në tregun e punës. Diskutimi u zhvillua gjatë panelit “AI for Business Growth”, i organizuar në kuadër të Panairit Ndërkombëtar të Tiranës.
Një mjet praktik për kompanitë
Teknologjia po shndërrohet gradualisht në një instrument konkret pune për bizneset, duke u lejuar atyre të kursejnë kohë, të automatizojnë detyra dhe të rrisin produktivitetin. Ndryshimet po ndihen në komunikimin me klientët, në hartimin e materialeve të marketingut dhe në përpunimin e informacionit, si në Shqipëri, ashtu edhe në rajon.
Sipas pjesëmarrësve në panel, kompanitë nuk kanë domosdoshmërisht nevojë për investime të mëdha për të përfituar nga AI. Hapi i parë, theksuan ata, është identifikimi i proceseve që mund të automatizohen.
“Problemet kryesore të një biznesi janë komunikimi dhe procedurat repetitive. AI është perfekt për të krijuar gjëra që janë repetitive, ndonjë foto, ndonjë dokument të shkruar apo raporte. Janë procese që mund të automatizohen nëse inteligjenca artificiale përdoret në mënyrë inteligjente dhe jo duke menduar se do të zëvendësojë njeriun”, u shpreh Daniel Taga.
Shqetësimi për punësimin e të rinjve
Përtej rritjes së eficiencës, përdorimi i kësaj teknologjie ngre pikëpyetje për tregun e punës. Një nga çështjet kryesore lidhet me të rinjtë: automatizimi i detyrave bazë rrezikon të ngushtojë pozicionet ku të sapodiplomuarit zakonisht marrin eksperiencën e tyre të parë profesionale.
“Studentët po kanë vështirësi më të madhe për t'u futur në punë dhe për të filluar karrierën, sepse karrierën e fillon me punë të lehta dhe AI po i zëvendëson punët e lehta. Kështu që studentët do të kenë vështirësi për të fituar eksperiencën dhe për t'u bërë profesionistë të nivelit të mesëm apo senior”, tha Fisnik Ismaili.
Roli i njeriut mbetet thelbësor
Gjithsesi, ekspertët nënvizuan se inteligjenca artificiale nuk e eliminon nevojën për kontributin njerëzor. Veçanërisht në marketing dhe në fushat krijuese, ideja, gjykimi profesional dhe njohja e klientit mbeten përbërës kyç për rezultate cilësore.
Sfida për bizneset, sipas tyre, është gjetja e ekuilibrit të duhur mes automatizimit dhe ekspertizës njerëzore, në një treg ku AI po bëhet gjithnjë e më shumë pjesë e punës së përditshme.
