12.5 C
Tirana
E shtunë, 24 Shkurt 2024

Dhjetë tendencat për t’u parë për vitin e ardhshëm

Viti i ardhshëm do të mbizotërohet nga nevoja për t'u përshtatur me realitetet e reja, post-pandemike

Duhen Lexuar

Nëse 2021 ishte viti në të cilin bota u kundërvu pandemisë, 2022 do të mbizotërohet nga nevoja për t’u përshtatur me realitetet e reja, si në fushat e riformësuara nga kriza pandemike (mënyra e re e punës, e ardhmja e turizmit, etj) ashtu edhe zhvillimi i tendencave të reja (rritja e Kinës, përshpejtimi i ndryshimeve klimatike). Më poshtë do të gjeni dhjetë nga temat dhe tendencat të cilat duhen parë e ndjekur vitin e ardhshëm.

  1. Demokracia apo Autokracia. Zgjedhjet në Amerikë dhe Kongresi i Partisë Komuniste të Kinës do të përbëjnë një kontrast të qartë ndaj sistemeve të tyre rivale politike. Cili është më i mirë për të ofruar stabilitet, rritje dhe inovacion? Ky rivalitet do të shfaqet në çdo gjë, nga tregtia te rregullimi dhe zhvillimi i teknologjisë, nga vaksinimet te stacionet hapësinore. Ndërsa Presidenti Joe Biden përpiqet të mbledhë botën e lirë nën flamurin e demokracisë, vendi i tij jofunksional dhe i ndarë është një reklamë e dobët për meritat e tij.
  2. Nga Pandemia në Normalitet. Pilula të reja antivirale, trajtime të përmirësuara të antitrupave dhe prodhimi i shumë më shumë vaksinave. Për njerëzit e vaksinuar në botën e zhvilluar, virusi nuk do të jetë më kërcënues për jetën, por do të përbëjë ende një rrezik vdekjeprurës në shtetet e varfëra dhe në zhvillim. Nëse numri i vaksinimeve në vendet në zhvillim nuk rritet së shpejti, Covid-19 do të kthehet në një nga shumë sëmundjet apo infeksionet normale me të cilat njeriu do të bashkëjetojë por që prekin më shumë të varfërit e pavaksinuar, por jo të pasurit.
  3. Shqetësimet për inflacionin. Ndërprerjet e zinxhirit të furnizimit dhe rritja e kërkesës për energji kanë rritur çmimet. Specialistët thonë se kjo situatë është e përkohshme, por jo të gjithë i besojnë. Britania është në rrezik të veçantë të madh nga fenonomeni i njohur si stagflacion, për shkak të mungesës së fuqisë punëtore pas Brexit dhe varësisë së saj nga gazi natyror i shtrenjtë.
  4. E ardhmja e punës. Ekziston një konsensus i gjerë se e ardhmja është “hibride” dhe se më shumë njerëz do të kalojnë më shumë kohë e ditë duke punuar nga shtëpia. Por ka shumë hapësirë ​​për mosmarrëveshje apo interpretim: Sa ditë, dhe cilat ditë do punohet nga shtepia dhe cilat në zyrë? Dhe a do të jetë e drejtë kjo ndarje? Si do të ndikojë? Sondazhet tregojnë se gratë janë më pak të prirura për t’u kthyer në zyrë, kështu që ato mund të rrezikojnë promovimet dhe avancimet në detyrë. Debatet lindin gjithashtu mbi rregullat tatimore dhe monitorimin e punëtorëve në distancë.
  5. “Techlash” i ri. Rregullatorët në Amerikë dhe Evropë janë përpjekur të frenojnë gjigantët e teknologjisë për vite me rradhë, por kanë ende shumë punë për të bërë për të arritur të krijojnë qoftë edhe një pengesë të vetme në rritjen apo fitimet e tyre. Tani Kina ka marrë drejtimin, duke goditur firmat e saj të teknologjisë në një goditje brutale. Presidenti Xi Jinping dëshiron që ata të përqendrohen në “deep tech” që ofron avantazhe gjeostrategjike, dhe jo më në teknologji bazike si lojërat dhe blerjet. Por a do të nxisë kjo inovacionin kinez apo do të mbysë dinamizmin e industrisë atje?
  6. Rritja e Kriptove. Ashtu si të gjitha teknologjitë e reja e të panjohura më parë, kriptovalutat “po zbuten” ndërsa rregullatorët shtrëngojnë rregullat. Bankat qendrore po kërkojnë gjithashtu të lançojnë monedhat e tyre dixhitale por të centralizuara. Rezultati është një luftë me tre drejtime për të ardhmen e financave – mes turmës kripto-blockchain-DeFi, kompanive tradicionale të teknologjisë dhe bankave qendrore – luftë kjo që do të intensifikohet në vitin 2022.
  7. Kriza e klimës. Edhe pse zjarret, valët e të nxehtit dhe përmbytjet rriten në frekuencë, një mungesë e habitshme urgjence mbizotëron midis politikëbërësve kur bëhet fjalë për trajtimin e ndryshimeve klimaterike. Për më tepër, dekarbonizimi kërkon që Perëndimi dhe Kina të bashkëpunojnë, ndërkohë që rivaliteti i tyre gjeopolitik po thellohet. Mbani një sy në ekipin kërkimor të gjeoinxhinierisë diellore në Harvard. Në vitin 2022, ata duan të testojnë përdorimin e një tullumbace në lartësi të madhe për të çliruar pluhur i cili mund të zbusë sadopak dritën e diellit – një teknikë që, me këtë ritëm, mund të jetë e nevojshme për t’i dhënë botës dhe Tokës më shumë kohë për dekarbonizimin.
  8. Probleme me udhëtimet. Aktiviteti po rritet me rihapjen e ekonomive. Por vendet që ndoqën një strategji “shtypjeje” për të ndaluar apo frenuar sadopak Covid-19, si Australia dhe Zelanda e Re, do përballen me detyrën e ndërlikuar të menaxhimit të tranzicionit në një botë në të cilën pritet që virusi të jetë pjesë e njerëzimit. Ndërkohë, duket se gjysma e udhëtimeve të biznesit janë zhdukur përgjithmonë. Kjo është një gjë e mirë për planetin, por e keqe për turistët, udhëtimet e të cilëve subvencionohen nga udhëtarët e biznesit me shpenzime të larta.
  9. Gara për në hapësirë. 2022 do të jetë viti i parë në të cilin më shumë njerëz do të shkojnë në hapësirë ​​si pasagjerë me pagesë (turistë) sesa punonjës të qeverisë, të cilët do të udhëtojnë në hapësirë nga disa kompani të ndryshme tashmë, të turizmit hapësinor. Kina do të përfundojë stacionin e saj të ri hapësinor. Regjizoret po konkurrojnë për të bërë filma në zero-G. Dhe NASA do të përplasë një sondë hapësinore në një asteroid, në një mision të jetës reale që tingëllon më shumë si një film hollivudian.
  10. Sporti dhe Lojrat politike. Lojërat Olimpike Dimërore në Pekin dhe Kupa Botërore e Futbollit në Katar do të mbetem në kujtesë se si sporti mund ta bashkojë botën – por edhe se si ngjarjet e mëdha sportive shpesh përfundojnë të jenë lojra politike. Priten protesta të drejtuara ndaj të dy vendeve pritëse, megjithëse bojkotet nga ekipet kombëtare duken të pamundura.

Zhvillimi i shpejtë i vaksinave mRNA kundër koronavirusit, një pikë e fituar nga njerëzimi në vitin 2021, është mbështetur në dekada punë për të krijuar atë që dukej si një sukses brenda natës. Cilat ndodhi apo teknologji të tjera në zhvillim mund të jenë gati të shpërthejnë për nga rëndësia vitin e ardhshëm?

- Reklama -
spot_img
- Reklama -

Artikujt e Fundit