Britania e Madhe ka nisur zbatimin e një sistemi të ri pa kontakt në pikat kufitare të aeroporteve, i cili do t’u japë mundësi udhëtarëve të caktuar të kalojnë përmes portave elektronike pa qenë e nevojshme të paraqitin fizikisht pasaportën. Ky projekt ka nisur këtë javë në aeroportin East Midlands, fillimisht i dedikuar për shtetasit britanikë.
Autoritetet synojnë që deri në fillim të vitit 2027 të përmirësojnë të gjitha portat elektronike në të gjithë vendin, duke e shtuar më pas këtë shërbim edhe për kombësi të tjera që përmbushin kushtet e përcaktuara. Kjo teknologji e re mbështetet te njohja e fytyrës për të bërë verifikimin e identitetit të personit. Kamera e vendosur në portë fotografon udhëtarin dhe e ballafaqon imazhin e kapur me të dhënat e regjistruara të udhëtimit, emigracionit dhe pasaportës. Në momentin që kontrollet dalin të suksesshme, barriera hapet në mënyrë automatike.
Bazuar në testimet e kryera nga autoritetet britanike, ky mekanizëm i ri mund të rezultojë deri në 25% më i shpejtë në krahasim me metodën tradicionale ku pasaporta vendoset fizikisht në lexues. Pavarësisht kësaj, udhëtarët këshillohen që të mbajnë gjithmonë pasaportën me vete, pasi në raste verifikimesh shtesë mund t'i kërkohet paraqitja e dokumentit ose drejtimi te një oficer i kufirit.
Për momentin, portat elektronike pa kontakt operojnë vetëm në aeroportin East Midlands. Gjatë fazave në vijim, ky sistem do të shtrihet edhe në aeroportet e tjera të vendit, përfshirë Birmingham, Bristol, Cardiff, Edinburgh, Gatwick, Glasgow, Heathrow, London City, Luton, Manchester, Newcastle dhe Stansted. Aktualisht, Britania numëron më shumë se 290 porta elektronike të shpërndara në 15 aeroporte dhe pika hekurudhore, ndërsa sistemi ekzistues shërben për shtetasit britanikë dhe irlandezë, si dhe për udhëtarët që zotërojnë të drejtën për të marrë autorizimin elektronik të udhëtimit (ETA).
