Kompania ajrore me kosto të ulët Ryanair ka nisur një riorganizim të rrjetit të saj, duke u larguar nga 13 aeroporte në Europë dhe jashtë saj dhe duke pakësuar linjat në disa vende. Procesi ka filluar që në fillim të vitit 2026 dhe parashikohet të zgjasë deri në mars të vitit 2027.
Arsyet kryesore pas këtij vendimi, sipas medias italiane Fanpage.it, janë kostot e larta të operimit, tarifat që aplikojnë aeroportet dhe vështirësitë gjeopolitike në disa tregje.
Kalendari i tërheqjeve
Hapi i parë u hodh në janar, kur kompania mbylli operimet në aeroportin e Vigos, në Spanjë. Në mars iu shtuan listës:
- Asturias në Spanjë;
- Clermont-Ferrand në Francë;
- Ponta Delgada dhe Terceira në ishujt Azore të Portugalisë;
- Amman në Jordani.
Në gusht, Ryanair u largua edhe nga aeroporti i Rodez në Francë. Për muajin tetor janë planifikuar ndërprerje të fluturimeve drejt Bodrumit dhe Dalamanit në Turqi, Kalamatës dhe Volosit në Greqi, si dhe Nishit në Serbi. Zinxhiri i ndryshimeve do të vazhdojë edhe vitin që vjen, me mbylljen e parashikuar të operimeve në aeroportin e Bremenit, në Gjermani, nga marsi 2027.
Aktiviteti i përgjithshëm vijon të rritet
Këto shkurtime ndodhin ndërkohë që veprimtaria e kompanisë në tërësi po zgjerohet. Gjatë vitit 2026, Ryanair ka realizuar mesatarisht 3,272 lëvizje ajrore në ditë, afërsisht 4% më shumë se një vit më parë, sipas të dhënave të cituara nga media italiane.
Modeli i biznesit të kompanisë bazohet te kontrolli i rreptë i kostove dhe te ruajtja e çmimeve konkurruese. Për pasojë, Ryanair zgjedh të ulë frekuencat ose të mbyllë operimet në aeroportet ku fitimi është nën pritshmëritë.
Gjithsesi, mbyllja e një linje nuk do të thotë domosdoshmërisht se ajo sjell humbje. Në disa raste, kompania e përdor kërcënimin e largimit nga një treg si mjet negocimi me aeroportet dhe qeveritë, me synimin për të përfituar tarifa më të leverdishme.
Kjo qasje mund të ketë pasoja ekonomike për destinacionet e prekura, sidomos në turizëm, punësim dhe në aktivitetin e aeroporteve rajonale.
