Kompania ajrore me kosto të ulët Ryanair ka filluar procesin e mbylljes graduale të bazës së saj në aeroportin “Maqedonia” të Selanikut, një hap që sjell pakësim të ndjeshëm të fluturimeve dhe të destinacioneve të ofruara nga qyteti grek. Vendimi ishte bërë i ditur që në maj dhe përfshin largimin e tre avionëve që kishin bazë në këtë aeroport.
I pari prej tyre është transferuar tashmë në Torino, ndërsa dy avionët e tjerë do të zhvendosen në Stokholm dhe në Tiranë.
Ndikimi te stafi dhe linjat
Masa prek rreth 200 pilotë dhe anëtarë të ekuipazhit. Një pjesë e tyre janë sistemuar në baza të tjera të kompanisë në Evropë, ndërsa të tjerët kanë humbur vendin e punës.
Ryanair nuk do të largohet tërësisht nga Selaniku, por do të heqë rreth dhjetë destinacione dhe do të reduktojë frekuencën e fluturimeve në disa linja. Më të prekurat janë lidhjet me Romën, Milanon, Vjenën, Brukselin dhe disa qytete të Gjermanisë.
Mosmarrëveshja për tarifat
Kompania pretendon se tarifat e aeroportit, i cili menaxhohet nga Fraport, janë shumë të larta dhe jokonkurruese, veçanërisht gjatë sezonit të dimrit. Sipas Ryanair, rritja e tarifave aeroportuale e zhbëri efektin e uljes së taksës shtetërore për pasagjerët që nisen nga Selaniku.
Të dhënat e publikuara tregojnë se, pasi taksa shtetërore u ul nga 12 në 3 euro për pasagjer, Fraport e ngriti tarifën e vet nga 7,35 në 17,52 euro, ndërsa tarifën e sigurisë nga 2,94 në 3,39 euro.
Nga ana e saj, Fraport e sheh vendimin e Ryanair si një strategji presioni për të fituar kushte financiare më të favorshme.
Pakësimi i fluturimeve pritet të ndihet nga udhëtarët. Në disa destinacione, linjat e braktisura nga Ryanair janë marrë nga kompani të tjera, por me më pak fluturime dhe me bileta më të shtrenjta.
