Ministrja e Ekonomisë dhe Inovacionit, Delina Ibrahimaj, paraqiti para Komisionit Parlamentar për Çështjet Ligjore dhe Administratën Publike projektligjin për strehimin social, duke sqaruar mënyrën se si do të funksionojë programi dhe kategoritë që do të kenë përparësi.
Kredia, qiraja dhe e drejta e blerjes
Sipas ministres, mbështetja financiare përmes kredisë mbetet ndër instrumentet kryesore të skemës, ndërsa ndihma për qiratë do të shtrihet edhe te studentët dhe profesionistët.
“Një nga instrumentet më të rëndësishme është mbështetja me kredi. Gjithashtu do zgjerojmë mbështetjen për qiratë, përfshirë studentët dhe profesionistë. Kur themi studentë, këtu përfshihen studentët në master, të cilët mund të jenë edhe në punë, jo ata në bachelor. Një mundësi tjetër është qiraja me të drejtë blerjeje”, tha Ibrahimaj.
Fond i ri dhe lagje me banesa të përziera
Për administrimin dhe zbatimin e programit do të krijohet Fondi për Strehim dhe Kohezion Social, i cili do të ketë karakter të trashëgueshëm.
Projektligji parashikon gjithashtu ndërtimin e lagjeve nga qeveria në bashkëpunim me pushtetin vendor, ku 30% e banesave do të jenë strehim social, 40% strehim i përballueshëm dhe 30% për tregun e lirë.
