Shitjet e automjeteve të Europë u rritën për të tretin muaj në tetor, teksa presionet në zinxhirët e furnizimit u lehtësuan disi, por shqetësimi është në rritje për shkak se përkeqësimi i ekonomisë mund të stepë blerësit – raportoi Automotive News Europe.
Regjistrimet e makinave të reja u rritën me 14% në 910 753 mjete, muajin e kaluar në Bashkimin Europian, Mbretërinë e Bashkuar dhe tregjet që bëjnë pjesë në Shoqatën për Tregtinë e Lirë në Europë.
Industria iu rikthye rritjes në gusht pas 12 muajsh rënieje.
Volkswagen, grupi me shitjet më të larta në rajon, u shkëput dukshëm nga të tjerët gjatë muajit me një rritje 40% në raport me një vit më parë. Numri 2 Stellantis shënoi rënie prej 1.8% ndërkohë që grupi Hyundai ra me 4.9%.
Teksa prodhuesit e makinave po përjetojnë kohë disi më pak të vështira sa i takon sigurimit të gjysmëpërcjellësve dhe komponentëve të tjerë që kanë munguar, kriza e energjisë e rajonit po rrit kostot dhe po pengon rimëkëmbje më domethënëse.
Shitjet e muajit të kaluar krahasuar edhe me një ecuri të ulët një vit më parë, ishin shumë nën nivelet e disa viteve më parë.
“Edhe me disa përmirësime të supozuara vitin e ardhshëm, tregu do të mbetet shumë nën atë që konsiderohej vëllimi normal i funksionimit para pandemisë” – shkruajnë analistët e LMC Automotive në një raport javën e kaluar.
Europa po përgatitet për një dimër të zymtë, ndërsa inflacioni dyshifror ka mbërthyer rajonin. Gjermania, ekonomia më e madhe e zonës, pritet të tkurret ndërsa Franca, Italia dhe Spanja mund të shënojnë rritje të papërfillshme. Në Mbretërinë e Bashkuar, ku shitjet e makinave janë kanë shënuar vitin më të keq që nga viti 1982, inflacioni arriti në nivelin më të lartë në 41 vjet muajin e kaluar.
Prodhuesit në rajon kanë filluar të shohin shenja se konsumatorët po bëhen skeptikë, me Stellantis që tregon tërheqje të lehtë në blerje. Edhe BMW paralajmëroi se rajoni është duke bërë hapa pas.
Automjetet luksoze të nivelit të lartë kanë qenë relativisht elastike dhe prodhuesit e automjeteve ende po përfitojnë nga porositë e paplotësuara të grumbulluara gjatë kulmit të krizave të tyre të zinxhirit të furnizimit.
Postimi ” Industria automotive, shitjet në tetor u rritën me 14%, rimëkëmbja e kërcënuar nga kriza ” eshte marre nga Revista Monitor.
