Overdrafti është një mjet financiar që përdoret nga individët dhe bizneset për të mbuluar nevojat financiare të papritura si dhe për të rritur likuiditetin. Për bizneset, overdrafti ofron një mjet të menjëhershëm për të përballuar mungesat e shkurtra të likuiditetit. Kryesisht këtë formë financimi e përdorin bizneset që operojnë në industritë me fluks të paqëndrueshëm të të ardhurave si psh restorantet, startup-et etj.
Nga ana tjetër, për individët overdrafti mund të jetë një alternativë për të likuiduar pagesat e vonuara ose për të përballuar emergjenca financiare të papritura. Por, pavarësisht nga qëllimi i përdorimit është e rëndësishme që individët dhe bizneset të kuptojnë kushtet dhe kufizimet e përdorimit të overdraftit për të shmangur kostot e tepërta.
‘Scan Intel’ ka analizuar të dhënat e Bankës së Shqipërisë për të kuptuar qasjen e individëve dhe bizneseve ndaj overdraftit, sipas monedhës së përdorimit. Shifrat tregojnë se në muajin shkurt të këtij viti, vlera e paradhënieve bankare të përdorura nga individët ishte 7.4 miliardë lekë nga 7.2 miliardë lekë të huazuara në muajin janar, duke konstatuar kështu një rritje mujore me 1.5%, ndërkohë që krahasuar me një vit më parë kjo rritje vlerësohet në 7%.
Periudha ku individët shfrytëzuan më shumë overdraftet përkon me fundin e vitit 2023, konkretisht gjatë muajit dhjetor, vlera e overdrafteve arriti në 8 miliardë lekë. Rritja e shfrytëzimit të overdrafteve nga individët mund të ketë ardhur si pasojë e rritjes së shpenzimeve konsumatore për shkak të inflacionit. Ndryshe nga overdraftet në lekë që kanë pësuar rritje, ato në monedhën europiane kanë shfaqur një rënie të lehtë.
Përsa i përket kategorisë së dytë që përdorin overdraft, pra bizneset, në muajin shkurt morën 7.4 miliardë lekë, ose 14% më shumë se në muajin janar. Në të kundërt nga individët, bizneset shfaqën më pak interes për të shfrytëzuar overdraftet në monedhën europiane vlera e të cilave paraqitet me rënie mujore 2% ndërsa krahasuar me një vit më parë kjo rënie rezulton të jetë vetëm 0.12%.
Në fund të analizës konkludojmë se vlera e overdrafteve në lekë të përdorura si nga individët dhe nga bizneset është rritur ndërkohë që vlera e overdrafteve në monedhë të huaj ka rënë dhe kjo shpjegohet nga luhatjet e kursit të këmbimit ku leku është është forcuar ndërsa euro është zhvlerësuar .
Armela Duka/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
