Intesa Sanpaolo Bank Albania ka nënshkruar një marrëveshje prej 20 milionë euro me Grupin e Bankës Evropiane të Investimeve (BEI), në kuadër të Facilitetit të ri për Inovacionin dhe Transformimin e Gjelbër për Ballkanin Perëndimor, me qëllim mbështetjen e Ndërmarrjeve të Vogla dhe të Mesme shqiptare në përpjekjet e tyre për inovacion, digjitalizim dhe tranzicion të gjelbër.
Marrëveshja u prezantua gjatë vizitës zyrtare në Shqipëri të Presidentes së Grupit BEI, Nadia Calviño, duke e bërë Shqipërinë vendin e parë përfitues të kësaj nisme të re rajonale. Ky facilitet financimi do të ofrojë kushte të favorshme kreditimi për bizneset shqiptare që investojnë në inovacion, transformim digjital, eficiencë energjetike dhe prodhim të qëndrueshëm.
Ceremonia e nënshkrimit u ndoq nga Kryeministri Edi Rama, Ministrja e Ekonomisë dhe Inovacionit Delina Ibrahimaj, Ministri i Financave Petrit Malaj, përfaqësues të lartë të qeverisë, zyrtarë të BEI-së, si edhe përfaqësues të Grupit Intesa Sanpaolo dhe Intesa Sanpaolo Bank Albania.
Gjatë fjalës së tij, Kryeministri Edi Rama vlerësoi ekspertizën dhe përvojën ndërkombëtare të Grupit Intesa Sanpaolo në zbatimin e programeve të mëdha financiare dhe partneriteteve strategjike në Evropë, duke theksuar rolin e rëndësishëm të Grupit në mbështetjen e zhvillimit ekonomik të Shqipërisë dhe procesit të integrimit evropian. Ai nënvizoi besimin që institucionet financiare ndërkombëtare kanë ndaj Intesa Sanpaolo dhe rëndësinë e të pasurit një partner bankar të fortë, të aftë për të ofruar zgjidhje financimi me ndikim për bizneset shqiptare.
Ministrja e Ekonomisë dhe Inovacionit Delina Ibrahimaj theksoi gjithashtu rëndësinë e marrëveshjes dhe përfitimet që ky facilitet i ri kreditimi do t’i sjellë ekonomisë shqiptare. Ajo u shpreh se programi do të përmirësojë ndjeshëm aksesin në financim për Ndërmarrjeve të Vogla dhe të Mesme, duke u mundësuar atyre të investojnë në inovacion, digjitalizim, qëndrueshmëri dhe rritje të konkurrueshmërisë. Ministrja Ibrahimaj e cilësoi gjithashtu Intesa Sanpaolo Bank Albania si një partner strategjik për komunitetin e biznesit dhe transformimin ekonomik të vendit.
Në kuadër të marrëveshjes me BEI-në, Intesa Sanpaolo Bank Albania do të zbatojë linjën e kreditimit prej 20 milionë Euro përmes zgjidhjeve të dedikuara financiare për kompanitë shqiptare të kualifikuara. Sipas kuadrit të financimit, investimet do të mbështesin kryesisht iniciativa në fushën e inovacionit, digjitalizimit, klimës dhe qëndrueshmërisë mjedisore.
Ky facilitet është pjesë e një programi më të gjerë rajonal që përfshin 170 milionë Euro hua nga BEI, 17 milionë Euro grante nga Bashkimi Evropian dhe asistencë teknike, me qëllim forcimin e ekosistemit të biznesit në Ballkanin Perëndimor.
“Përmes kësaj marrëveshjeje me Grupin BEI, Intesa Sanpaolo Bank Albania rikonfirmon angazhimin e saj për të mbështetur rritjen e qëndrueshme dhe konkurrueshmërinë e bizneseve shqiptare. Duke u mbështetur në forcën e Grupit Intesa Sanpaolo dhe partneritetin tonë afatgjatë me institucionet evropiane, ne po u mundësojmë Ndërmarrjeve të Vogla dhe të Mesme të përshpejtojnë rrugëtimin e tyre drejt inovacionit, transformimit digjital dhe tranzicionit të gjelbër,” deklaroi Giuseppe Giampietro, Drejtor i Përgjithshëm Ekzekutiv i Intesa Sanpaolo Bank Albania.
Kjo marrëveshje forcon më tej rolin e Intesa Sanpaolo Bank Albania si një partner financiar kyç për bizneset në Shqipëri dhe konfirmon angazhimin e Bankës për të mbështetur rritjen ekonomike të qëndrueshme dhe integrimin më të afërt të vendit me ekonominë evropiane.
Postimi ” Intesa Sanpaolo Bank, nënshkruan marrëveshje 20 mln Euro me BEI për të mbështetur bizneset shqiptare ” eshte marre nga Revista Monitor.
