Deputetët e Komisionit të Ekonomisë dhe Financave me votat e mazhorancës votuan nen për nen buxhetin dhe projektligjet e paketës fiskale.
Deputetët miratuan pa ndryshime projektligjin për akcizat që unifikon akcizën e birrës dhe pijeve alkoolike.
Gjatë miratimit për projektligjin për TVSH-në u kthyen debatet për heqjen e skemës së kreditueshme të TVSH-së.
Deputetët e mazhorancës dhe opozitës ngritën shqetësimin për efektet negative që ka dhënë te sektorët përpunues heqja e skemës së kreditueshme të TVSH-së. Deputetët kërkuan rikthimin e skemës së kreditueshme të TVSH-së.
Deputeti Erion Braçe tha se asnjë vend nuk e ka këtë formë të TVSH-së 0 në hyrje dhe 20% në dalje. Braçe kërkoi balancimin e skemës, nëpërmjet autofaturimit, jo rimbursim, por kreditim të TVSH-së 20% në grumbullim dhe 20% në përpunim, siç është propozuar nga KASH. “Rregullojeni këtë sepse është e padrejtë dhe po krijon probleme me grumbullimin e ullirit, domateve, qumështit, grurit”.
Ish ministrja e Financave Anila Denaj tha se skemat e autofaturimit nuk mund të kthehen në versionin e mëparshëm, sepse diferenca në informalitet ka rezultuar se ishte 4 herë më e madhe se ajo që ekzistonte e deklaruar.
“Nga të dhënat e regjistruara rezultoi se për rimbursimin e fermerëve nevojiteshin 290 milionë lekë, ndërkohë Ministria e Bujqësisë kërkoi 4-fishin e vlerës. Kishte diferencë shumë të madhe nga të dhënat e Ministrisë së Financave dhe ajo që kërkohej nga Ministria e Bujqësisë për shkak të informalitetit”, pohoi ajo.
Në projektligjin “Për proceduarat tatimore” u miratuan ndryshimet e propozuara nga deputetë për mbajtjen e nivelit cash. Bizneset me xhiro deri 2 milionë lekë parashikohej që nuk mund të mbanin më shumë se 55,000 lekë tashmë niveli cash do të shkojë deri 150,000 lekë. Për bizneset me xhiro nga 2 – 10 milionë lekë parashikohej jo më shumë se 250,000 lekë arrin 500,000 dhe ato mbi 10 milionë lekë jo më shumë se 500,000 lekë apo 2% e qarkullimit vjetor do të jetë 500,000 lekë apo 5% e qarkullimit vjetor. Për zyrat e këmbimit valutor ministrja Ibrahimaj kërkoi që cash flow të jetë 5 milionë lekë nga 10 milionë lekë që u kërkua nga deputetët.
Në miratimin e ligjit të buxhetit u miratuan kërkesat e disa institucioneve për shtim fondesh, si për Kuvendin, Avokati i Popullit, Instituti kundër Krimit të Komunizmit, Komisionerit Publik, Autoritetin e Konkurrencës, Presidencës, KQZ, Autoritetin Kombëtar për Krimin Kibernetik, Shërbimet Qeveritare, Ministrisë së Kulturës, RTSH, Kryeministrisë, Akademisë së Shkencave, Arkivën e Shtetit për rritjen e numrit të punonjësve dhe të shpenzimeve kapitale.
Deputetët miratuan edhe shtimin e të ardhurave për sektorin e energjetikës nga grantet e BE-së me vlerë 80 milionë euro. Në skemën e sigurimeve transferta për indeksimin e pensioneve u miratua 2,2 miliardë lekë.
Deputetët e opozitës kërkuan të rritet transferta për emergjencat për pushtetin vendor për shkak të përmbytjeve.
Ministrja e Financave dhe Ekonomisë Delina Ibrahimaj tha se njësitë e qeverisjes vendore përveç fondit të emergjencave kanë në dispozicion dhe 1,2 mld lekë për shpenzime kapitale, pra në total 2 mld lekë për emergjencat civile.
“Bashkitë kanë fondet e tyre rezervë për përballimin e emergjencave dhe në raste përmbytesh mund të angazhohet edhe fondi rezervë i qeverisë për t’i bërë ballë situatave të papërballueshme”, pohoi ajo.
Postimi ” Komisioni i Ekonomisë miraton nen për nen buxhetin dhe paketën; Deputetët kërkojnë kthimin e skemës së TVSH për përpunuesit ” eshte marre nga Revista Monitor.
