Të ardhurat nga kontributet për sigurimet shoqërore dhe shëndetësore arritën në mbi 150.9 miliardë lekë, rreth 1.65 miliardë euro, gjatë periudhës janar-shtator 2026. Këto janë shumat që të punësuarit në sektorin privat dhe atë publik derdhën në arkën e shtetit, sipas të dhënave zyrtare të Ministrisë së Financave. Edhe pse skema e pensioneve vijon të jetë në deficit për shkak të raportit të pafavorshëm mes numrit të ulët të kontribuuesve dhe numrit të lartë të përfituesve, shifrat sugjerojnë një forcim gradual të saj.
Krahasuar me nëntëmujorin e vitit 2025, janë mbledhur 15.9 miliardë lekë më shumë, që përkthehet në një rritje prej 13.5%. Plani për nëntë muajt e 2026-s është realizuar në masën 100.5%. Niveli i arkëtimeve është gjithashtu më i larti i dekadës së fundit: në vitin 2016 të ardhurat nga kontributet ishin 57.3 miliardë lekë, çka do të thotë se ato janë rritur me 163.35% brenda dhjetë vitesh.
Më shumë kontribuues dhe paga më të larta
Ecuria pozitive shpjegohet me disa faktorë që kanë zgjeruar bazën e kontribuuesve dhe kanë rritur shumat e deklaruara. Gjatë vitit të kaluar, në skemën e sigurimeve shoqërore u shtuan mbi 31 mijë kontribuues, duke e çuar numrin total në 836,910 në vitin 2025.
Ndikim të drejtpërdrejtë ka pasur edhe rritja e pagave në të dy sektorët. Paga mesatare në vend, e cila tashmë i është afruar nivelit prej 1 mijë eurosh në muaj, ka rritur kontributet shoqërore dhe shëndetësore që paguhen për çdo të punësuar.
Formalizimi i tregut të punës
Një pjesë e rritjes së arkëtimeve lidhet me masat për formalizimin e punësimit. Kontrollet ndaj nëndeklarimit të pagave dhe përpjekjet për t’i përafruar pagat e deklaruara me të ardhurat reale kanë zgjeruar bazën mbi të cilën llogariten kontributet, duke përmirësuar deklarimin e pagave dhe të punësimit.
Në të njëjtin drejtim kanë vepruar edhe pagat referencë të vendosura këtë vit për disa sektorë të ekonomisë, mes të cilëve turizmi, ndërtimi dhe shërbimet mjekësore. Këto nivele synojnë të ngushtojnë diferencën mes pagave që deklarohen dhe atyre që praktikohen realisht në treg, duke rritur njëkohësisht bazën e kontributeve të pagueshme.
Efekti i pagës minimale
Rritja e pagës minimale në 50 mijë lekë në muaj, e cila hyri në fuqi nga janari 2026, ka sjellë edhe rritjen e detyrimit minimal për pagesën e kontributeve shoqërore dhe shëndetësore. Për individët, pagesa minimale mujore për këto sigurime llogaritet aktualisht në rreth 13,950 lekë.
Përveç këtyre, kontributet janë mbështetur edhe nga zgjerimi i aktivitetit ekonomik dhe shtimi i numrit të subjekteve që ushtrojnë aktivitet të deklaruar.
