Lista Studentore në Serbi ka hedhur në diskutim një paketë të re masash për tregun e punës dhe të drejtat sociale, në qendër të së cilës qëndron java katërditore e punës pa ulje të pagës. Sipas propozimit, punonjësit do të punonin 32 orë në javë, duke ruajtur të njëjtën pagë që marrin aktualisht. Modeli nuk parashikohet të jetë i detyrueshëm për të gjitha bizneset, por do të zbatohej vetëm nga punëdhënësit që zgjedhin ta adoptojnë.

Kontrata dhe mbrojtje nga largimet

Programi synon që kontratat me afat të caktuar të mos zgjasin më shumë se 12 muaj, pas të cilëve punonjësit do të kishin mundësi të kalonin në kontrata të përhershme. Po ashtu, parashikohet forcimi i mbrojtjes ndaj largimeve të padrejta nga puna dhe ndaj presionit për ndërprerjen e kontratave.

Shtesa më të larta për punën në kushte të veçanta

Lista Studentore kërkon rritje të kompensimeve për punën jashtë kushteve të zakonshme:

  • të paktën 150% për punën gjatë festave zyrtare;
  • 110% për punën të dielave;
  • 50% për punën gjatë natës ose jashtë orarit.

Shtesa parashikohen gjithashtu për punën me ndërrime dhe për atë në terren.

Të drejtat prindërore dhe pushimi mjekësor

Gratë që kanë qenë të punësuara para shtatzënisë do të përfitonin pushimin e lehonisë, pavarësisht llojit të kontratës që kanë. Për baballarët propozohet një pushim tremujor pas lindjes së fëmijës. Për pushimin mjekësor në 30 ditët e para kërkohet një kompensim prej të paktën 75% të pagës.

Paketa përfshin edhe të drejtën e punonjësve për të mos iu përgjigjur kërkesave të punës pasi të ketë përfunduar dita e punës, si dhe masa për mbrojtjen e atyre që punojnë përmes platformave digjitale dhe agjencive të punësimit.

Ndryshime në sistemin e pensioneve

Në fushën e pensioneve propozohet indeksimi dy herë në vit, rritja e të ardhurave për pensionistët me pensione të ulëta dhe krijimi i një pensioni social për personat mbi 65 vjeç që nuk plotësojnë kushtet për pension kontributiv.

Gjithsesi, këto mbeten propozime të Listës Studentore dhe nuk janë ende ndryshime ligjore të miratuara. Zbatimi i tyre do të kërkonte ndryshime në legjislacionin serb.