Qytetarët që aplikojnë për pajisje me patentë ose për rinovimin e saj do të ndjekin një procedurë të re për kontrollin mjekësor. Dokumentet shëndetësore do të plotësohen dhe do të nënshkruhen në mënyrë elektronike nga mjekët, ndërsa rezultatet do të dërgohen drejtpërdrejt në DPSHTRR. Dokumenti përfundimtar do t’i vijë qytetarit nëpërmjet platformës e-Albania.
Hapat e procedurës
Në fillim, aplikanti paraqitet te mjeku i familjes, i cili verifikon kartelën shëndetësore dhe dokumentet e nevojshme. Pas kësaj, ai kryen vizitat te specialistët e shikimit dhe të dëgjimit, të cilët e plotësojnë certifikatën mjekësore elektronikisht.
Në rastet kur gjatë vizitave dalin probleme shëndetësore ose ka dyshime për aftësinë fizike dhe psikike të drejtuesit, qytetari mund të dërgohet pranë Komisionit Mjekësor. Ky komision vendos nëse personi është i aftë për të drejtuar automjetin, i aftë me kufizime apo i paaftë.
Sëmundjet e kaluara nuk kufizojnë automatikisht patentën
Udhëzimi parashikon gjithashtu që një sëmundje e kaluar dhe e shëruar të mos çojë automatikisht në kufizimin e vlefshmërisë së patentës. Vlerësimi do të mbështetet në gjendjen aktuale shëndetësore të aplikantit.
Pasi përfundon kontrolli, dokumentacioni transferohet elektronikisht në DPSHTRR, ndërsa qytetari e merr atë përmes e-Albania. Tarifat mbeten të pandryshuara. Procedura e re do të hyjë në zbatim pas aktivizimit të sistemeve elektronike, dhe deri në atë moment do të vazhdojë të zbatohet udhëzimi i vitit 2015.
