Familjet në Bashkimin Europian po përballen me një rritje të vazhdueshme të kostos së jetesës, e cila prek njëkohësisht ushqimet, faturat e energjisë, qiratë, banesat dhe arsimin. Të dhënat e Eurostat tregojnë se inflacioni në eurozonë arriti në 3.8% në shtator, një nivel pothuajse dy herë më i lartë se objektivi i Bankës Qendrore Europiane. Në të njëjtën kohë, çmimet e energjisë janë rritur me 18.8% në periudhën njëvjeçare.
Shqetësim në supermarket
Efektet e shtrenjtimit janë të dukshme edhe në blerjet e përditshme. Sipas një analize të Bankës Qendrore Europiane, 35% e konsumatorëve në BE janë të shqetësuar nëse do të arrijnë të mbulojnë shpenzimet për ushqime. Po ashtu, 74% e tyre kanë vënë re se produktet e konsumit të përditshëm po vijnë në madhësi më të vogla, ndërkohë që çmimi mbetet i pandryshuar.
Strehimi dhe arsimi nën presion
Faturat e shtrenjta të energjisë e kanë vështirësuar ngrohjen e banesave, ndërsa kostot e ndërtimit dhe mungesa e shtëpive vazhdojnë të çojnë lart çmimet e pronave dhe qiratë. Në Portugali, çmimet e banesave u rritën me 16.5% brenda një viti.
Vështirësi ka edhe në sektorin e arsimit. Shkollat po përballojnë kosto më të larta operimi, ndërsa familjet duhet të paguajnë për libra, transport dhe materiale shkollore. Në vitin 2024, arsimi përbënte 9.7% të shpenzimeve publike të BE-së, krahasuar me 10% në vitin 2019.
Masat e Komisionit Europian
Për të përballuar situatën, Komisioni Europian ka paraqitur disa nisma, mes tyre planin për energji më të përballueshme, Fondin Social për Klimën me vlerë 86.7 miliardë euro dhe planin europian për strehim të përballueshëm. Në shtator u propozua edhe një akt për strehimin, ndërkohë që është prezantuar strategjia e parë kundër varfërisë.
Gjithsesi, shumë nga këto masa kanë synime afatgjata, ndërsa rritja e çmimeve po i godet familjet tashmë. Sfida kryesore për BE-në mbetet shpejtësia me të cilën këto politika do të sjellin lehtësim konkret për qytetarët.
