Rritja e çmimeve është shoqëruar me më shumë të ardhura në buxhetin e shtetit, çka i ka dhënë mundësi qeverisë që të rishikojë buxhetin e këtij viti. Ndryshe nga sa ka ndodhur vitet e fundit, kur buxheti është riparë në rënie, këtë vit, qeveria do të rishpërndajë rreth 5 miliardë lekë të ardhura shtesë, por edhe fonde nga projektet e parealizuara drejt atyre me ecuri më të shpejtë.
Por teksa qytetarët kanë paguar më shumë për mallrat dhe shërbimet, të prekur drejtpërdrejtë nga shtrenjtimi i çmimeve, sa do të marrin mbrapsht? Kush do të përfitojë nga të ardhurat e krijuara nga rritja e çmimeve? Sa janë ndihmuar ata përballë krizës së çmimeve? Për këtë u diskutua mbrëmjen e së mërkurës në A2 Business nga Aurora Sulçe.
Eksperti për ekonominë, Bardhi Sejdarasi, u shpreh se një pjesë e madhe shkojnë për procesin e rindërtimit. “Deklarimi për një akt normativ të ri shtesë ishte bërë në momentin që diskutohej në komisione edhe buxheti 2023, që në fund të vitit do të kishte një akt të ri, i cili do të rialokonte të ardhurat që do të vinin nga rritja e çmimeve.
Ne do të flasim në vijim se ku kanë shkuar fondet. Akti i fundvitit i qeverisë merr në konsideratë këtë çështje, riaktivizimin e të gjitha projekteve të rindërtimit, si dhe plotësimin me financa për të gjitha faturat tashmë të dorëzuara në buxhetin e shtetit. Një pjesë e madhe e tyre nuk janë paguar. Pjesa më e madhe ndikon te elementi që procesi i rindërtimit të marrë të gjitha ato shpenzime që ishin të nevojshme, që janë deklaruar”, tha Sejdarasi.
Burimi: A2 CNN
