11.5 C
Tirana
E premte, 1 Mars 2024

Mbretëria e Bashkuar do të fillojë provën më të madhe në botë për javën me 4 ditë punë

Duhen Lexuar

Java e ardhshme me shumë mundësi do të jetë më e menaxhueshme për mbi 3,300 punonjës në Mbretërinë e Bashkuar, të cilët, duke filluar nga dita e hënë, po marrin pjesë në atë që thuhet se është prova më e madhe në botë për javën me katër ditë punë.

Nga sot e deri në muajin dhjetor, punonjësit në mbi 70 firma në Mbretërinë e Bashkuar do të marrin 100% të pagave të tyre normale, në këmbim të vetëm 80% të kohës së tyre të zakonshme të punës, si pjesë e eksperimentit më të fundit nga grupi 4 Day Week Global për t’i dhuruar punonjësve një fundjavë me tre ditë.

“Teksa jemi duke dalë nga situata e pandemisë, gjithnjë e më shumë kompani po e kuptojnë se kufiri i ri i konkurrencës është cilësia e jetës dhe se puna me orë të reduktuara, e fokusuar në rezultate, është mjeti më i rëndësishëm për t’u dhënë atyre një avantazh konkurrues,” tha në një deklaratë Joe O’Connor, shefi ekzekutiv i 4 Day Week Global.

Pandemia përshpejtoi reformimin e punës, si për shembull nëpërmjet miratimit të gjerë të politikave për punën në distancë, një vendim të cilin disa kompani tani e kanë pasur të vështirë për ta kthyer mbrapsht, ndërsa disa kompani të tjera kanë vendosur që ta miratojnë punën në distancë me kohë të plotë.

Disa kompani, duke përfshirë gjigantin e mallrave të konsumit Unilever, liderin në fushën e elektronikës Panasonic dhe grupin e softuerit Microsoft, provuan javën me katër ditë punë gjatë pandemisë, si pjesë e një rivlerësimi më të gjerë të mënyrës se si punëdhënësit dhe punonjësit ndërveprojnë me njëri-tjetrin.

Unilever është ende duke vazhduar me këtë provë, ndërsa Panasonic e ka bërë javën me katër ditë punë opsionale për punonjësit në Japoni. Ndërkohë, Microsoft tha se nga ky eksperiment u vu re një rritje e produktivitetit me 40% gjatë periudhës së provës.

Mbi 70 kompanitë që marrin pjesë në provën e Mbretërisë së Bashkuar për javën me katër ditë punë, e cila po koordinohet nga instituti britanik Autonomy, mbulojnë një sërë industrish të ndryshme, duke përfshirë sektorin e arsimit, të konsulencës, industrinë bankare, shitjen me pakicë, etj. Disa nga pjesëmarrësit janë: prodhuesi Rivelin Robotics, zhvilluesi i lojërave Hutch, agjencia e dizajnit IE Brand dhe ofruesi i shërbimeve të komunikimit për korporatat,Yo Telecom.

Studiues nga Universiteti i Oksfordit, Universiteti i Kembrixhit dhe Kolegji i Bostonit po bashkëpunojnë në këtë eksperiment për të matur ndikimin social të ofrimit të një fundjave më të gjatë për punonjësit. Studiuesit do të shikojnë mënytën se si ky orar më i balancuar do të ndryshojë oraret e gjumit të punonjësve, nivelet e tyre të stresit, shpenzimin e energjisë dhe udhëtimet, si dhe faktorë të tjerë.

“Java me katër ditë punë përgjithësisht konsiderohet të jetë një politikë e trefishtë, pasi ndihmon punonjësit, kompanitë dhe klimën,” tha në një deklaratë Juliet Schor, profesore e sociologjisë në Kolegjin e Bostonit dhe studiuesja kryesore në këtë projekt pilot. “Studimet tona do të thellohen në të gjitha këto aspekte.”

Eksperimenti i fundit më i madh për javën me katër ditë punë u mbajt në kryeqytetin e Islandës, Reykjavík, dhe përfshiu mbi 2,500 punonjës të sektorit publik që ndoqën një orar të reduktuar të punës gjatë viteve 2015 dhe 2016.

Ky eksperiment ishte një “sukses i jashtëzakonshëm”, sipas Autonomy, e cila shqyrtoi rezultatet e këtij projekti pilot në Islandë. Punonjësit raportuan nivele më të ulëta të stresit dhe përmirësim të shëndetit të tyre gjatë periudhës së studimit, dhe, më e rëndësishmja, punëdhënësit vunë re se produktiviteti i përgjithshëm ose kishte mbetur njësoj, ose ishte rritur.

Projekti pilot në Mbretërinë e Bashkuar po zhvillohet së bashku me skema të ngjashme që po aplikohen në Irlandë, në SHBA, në Kanada, në Australi dhe në Zelandën e Re.

- Reklama -
spot_img
- Reklama -

Artikujt e Fundit