16.5 C
Tirana
E diel, 25 Shkurt 2024

Aeroporti Heathrow urdhërohet të ulë tarifat e pasagjerëve çdo vit deri në 2026

Duhen Lexuar

Aeroporti Heathrow i Londrës është urdhëruar të reduktojë tarifat gjatë katër viteve të ardhshme, një propozim ky që do të kënaqë linjat ajrore, por aeroporti tha se kjo do të rezultonte në një përvojë më të keqe për pasagjerët.

Kjo lëvizje nga Autoriteti i Aviacionit Civil i jep një goditje aeroportit, i cili synonte të aplikonte tarifa më të larta për të ndihmuar në mbrojtjen e shërbimit ndaj klientit, në një kohë kur industria e udhëtimeve po rimëkëmbet nga pandemia.

Agjencia rregullatore tha se çmimi mesatar maksimal për çdo pasagjer që linjat ajrore do të duhet t’i paguajnë Heathrow-t do të reduktohet nga 30,19 £ që është tani, në 26,31 £ në vitin 2026. Duke përjashtuar efektet e inflacionit, kjo është e barabartë me një ulje prej gati 6% çdo vit deri në 2026.

AAC tha se propozimet përfundimtare do të ishin “në interesin më të mirë të konsumatorëve”. Autoriteti është duke ndërmarrë një konsultim dhe do të shpallë vendimin përfundimtar gjatë këtij viti.

Gjatë një mosmarrëveshjeje të ashpër, linjat ajrore kërkonin një reduktim të tarifave, ndërsa Heathrow argumentonte se kjo do të dëmtonte shërbimin ndaj klientit. AAC-ja tha se të dyja palët kishin “pikëpamje krejtësisht të ndryshme lidhur me nivelin e tarifave për pesë vitet e ardhshme”.

Shefi ekzekutiv i aeroportit, John Holland-Kaye, tha: “AAC-ja vazhdon të nënvlerësojë atë që nevojitet për të ofruar një shërbim të mirë për pasagjerët, si në aspektin e nivelit të investimeve dhe të kostove operative, ashtu dhe në nxitjen e nevojshme për investitorët privatë që ta financojnë atë.”

“Nëse nuk korrigjohet, ky propozim i AAC-së do të rezultojë vetëm në një përvojë më të keqe për pasagjerët në Heathrow, teksa investimet në shërbime do të shterojnë.”

Kufiri i tarifave ishte 22 £ për pasagjer në vitin 2020, por u rrit në më shumë se 30 £ në muajin janar.

Richard Moriarty, shefi ekzekutiv i AAC-së, tha: “Njoftimi i sotëm lidhet me bërjen e gjësë së duhur për konsumatorët. Ne kemi dëgjuar me shumë kujdes si aeroportin Heathrow, ashtu edhe linjat ajrore. Ata kanë pikëpamje të ndryshme për nivelin e tarifave në të ardhmen. Analiza jonë e pavarur dhe e paanshme krijon një balancë për tarifa të përballueshme për konsumatorët, ndërkohë që i jep mundësinë Heathrow që të vazhdojë me investimet e nevojshme në të ardhmen.”

AAC tha se rritja e kërkesës për udhëtime do të rezultojë në një rimëkëmbje të qëndrueshme në sektorin e aviacionit gjatë katër viteve të ardhshme, duke vënë në dukje se kishte pasur “rritje të dukshme” të udhëtimeve gjatë pranverë pasi u hoqën kufizimet e udhëtimit në Mbretërinë e Bashkuar dhe në vendet e tjera.

Numri i pasagjerëve në maj ishte sa 79% e nivelit para fillimit të pandemisë. Megjithatë, pasiguritë vazhdojnë edhe përgjatë vitit të ardhshëm dhe numri i pasagjerëve në Heathrow nuk parashikohet të kthehet në nivelet e vitit 2019, të paktën deri në vitin 2025.

- Reklama -
spot_img
- Reklama -

Artikujt e Fundit