Rail Europe ka përzgjedhur pesë destinacione në Britaninë e Madhe që mund të vizitohen me tren nga adhuruesit e Harry Potter, duke u ofruar turistëve mundësinë të shohin nga afër vendet reale ku u xhiruan filmat e sagës. Edhe pse bota e magjisë në libra dhe filma është e trilluar, shumë nga mjediset ku zhvillohet historia ekzistojnë vërtet.
Simboli kryesor i këtyre udhëtimeve është treni Hogwarts Express, i cili në film u realizua me lokomotivën me avull Olton Hall dhe u kthye në një nga imazhet më të njohura të serisë.
Platforma 9¾ në King’s Cross
Pika e nisjes për çdo itinerar të frymëzuar nga Harry Potter është stacioni King’s Cross në Londër. Aty vizitorët fotografohen pranë karrocës së famshme të bagazheve, e cila duket sikur futet brenda murit. Nga ky stacion nisen edhe trenat drejt veriut të Anglisë, përfshirë Durham dhe Yorkshire, dy zona që lidhen drejtpërdrejt me filmat.
Studiot Warner Bros. në Hertfordshire
Afër Londrës, Warner Bros. Studio Tour do të zhvillojë aktivitetin “Hogwarts in the Snow” nga 14 nëntori 2026 deri më 17 janar 2027. Gjatë kësaj periudhe, skenografitë origjinale marrin pamje dimërore, me dëborë dhe zbukurime festive. Udhëtarët mund të marrin trenin nga London Euston për në Watford Junction dhe më tej autobusin e studiove. Biletat e hyrjes duhet të rezervohen veçmas.
Viadukti Glenfinnan në Skoci
Kalimi i Hogwarts Express mes maleve skoceze është ndër skenat më të njohura të filmave. Viadukti Glenfinnan është atraksion i vërtetë dhe mund të shihet edhe me trenat e rregullt të ScotRail që lidhin Fort William me Mallaig. Kjo linjë ofron disa nga pamjet më mbresëlënëse të Skocisë.
Oksfordi
Kolegjet shekullore, rrugicat historike dhe sallat madhështore të Oksfordit u përdorën si mjedise të shkollës Hogwarts. Divinity School, pjesë e Bibliotekës Bodleian, shërbeu si infermieria e shkollës, ndërsa në filma u shfaqën edhe Biblioteka Duke Humfrey dhe shkallët e kolegjit Christ Church. Me rreth 45 minuta udhëtim me tren nga Londra, qyteti është i përshtatshëm për një vizitë njëditore.
Durham
Katedralja e Durhamit, me arkitekturë normane dhe korridore prej guri, u përdor për disa skena të Hogwarts. Në oborrin e saj u xhirua momenti kur Harry lëshon në fluturim bufin Hedwig, ndërsa salla Chapter House u kthye në klasën e profesoreshës McGonagall. Qyteti ofron gjithashtu shëtitje buzë lumit dhe rrugica mesjetare. Udhëtimi me tren nga Londra zgjat rreth tri orë.
Goathland në Yorkshire
Stacioni Goathland në North Yorkshire u shfaq si stacioni Hogsmeade në filmin e parë të serisë. Ai bën pjesë në hekurudhën historike North Yorkshire Moors Railway, e cila kalon përmes peizazheve kodrinore dhe natyrore. Si pika nisjeje mund të përdoren Whitby ose Grosmont. Duke qenë se trenat historikë qarkullojnë sipas sezonit, këshillohet që oraret të kontrollohen paraprakisht.
