Ministria e Financave njoftoi se përmbylli përgatitjen e paketës së akreditimit për Programin IPARD III, duke shënuar një hap të rëndësishëm drejt aksesimit të fondeve të Bashkimit Evropian për zhvillimin e bujqësisë dhe zonave rurale.
Nën drejtimin e Zyrtarit Kombëtar Autorizues (ZKA), dhe me mbështetjen e strukturave përkatëse, Drejtorisë Mbështetëse të ZKA-së dhe Drejtorisë së Fondit Kombëtar u përgatit një dokumentacion i plotë, në përputhje me standardet e Bashkimit Evropian.
Paketa e dorëzuar përfshin kërkesën për besimin e detyrave të zbatimit buxhetor, të shoqëruar me prova të detajuara mbi përmbushjen e kritereve të përcaktuara nga Komisioni Evropian.
Dorëzimi i kësaj pakete përbën një moment kyç në përgatitjet për çeljen e fondeve të IPARD III, e cila synohet të realizohet gjatë vitit 2026, sipas financave.
Në vijim, procesi do të hyjë në fazën e vlerësimit nga shërbimet e Komisionit Evropian (DG AGRI), që përfshin analizën e detajuar të dokumentacionit dhe verifikime të mundshme në terren. Kjo fazë parashikohet të zhvillohet gjatë tremujorit të dytë të këtij viti.
Ministria e Financave njofton se mbetet e angazhuar për të garantuar përmbushjen e të gjitha standardeve të kërkuara nga Bashkimi Evropian dhe për të mundësuar përthithjen efektive të fondeve IPARD III, në funksion të rritjes së konkurrueshmërisë së sektorit bujqësor dhe zhvillimit të qëndrueshëm të zonave rurale, përfundon njoftimi.
Në gusht 2023, Zyra Evropiane Kundër Mashtrimit (OLAF) konstatoi shkelje të rënda dhe keqpërdorime të fondeve të programit IPARD II, pas hetimeve të nisura mbi denoncime të qytetarëve për korrupsion, favorizime dhe ndërhyrje politike.
Në nëntor të vitit të kaluar Ministri i Financave, Petrit Malaj, deklaroi në Komisionin e Bujqësisë se programi IPARD III, i pezulluar që prej vitit 2023, do të rihapet në vitin 2026.
Sipas tij, qeveria po përmbush masat e kërkuara nga Komisioni Europian pas parregullsive të konstatuara në fazën e dytë të programit, dhe pritet që fondet të zhbllokohen pas vlerësimit të plotë nga DG Agri.
më herët, Salla Saastamoinen, drejtoreshë në detyrë e OLAF (Zyra Evropiane kundër Mashtrimit), që gjeti shkelje në përdorimin e fondeve IPARD, Komisioni kishte kurkuar masa konkrete nga Shqipëria.
Në total fondet nëpërmjet IPARD III parashikohen në vlerën e 146 mln eurove apo 55% më shumë fonde sesa programi IPARD II. Kontributi i BE-së ishte në një fond prej 112 milionë eurosh. IPARD III përfshinte 9 masa të reja financimi nga 3 masa që përfshinte programi i mëparshëm.
Për programin e mëparshëm IPARD II, në korrik 2023 Komisioni Europian ndërpreu financimin, pas dyshimeve për korrupsion që çuan në nisjen e hetimeve nga Zyra Europiane Kundër Mashtrimit.
Në 2024 OLAF njoftoi zyrtarisht se nga hetimet kishte identifikuar si të papërshtatshme 33 mln euro fonde të thirrjes së parë dhe të dytë të programit. Programi IPARD II i cili u përfshi në një proces hetimi kishte në total një fond prej 94,6 mln euro në total, nga të cilat 71 mln euro ishin financime të BE-së.
Postimi ” Ministria e Financave avancon në procesin e çeljes së fondeve të programit IPARD III ” eshte marre nga Revista Monitor.
