Revista National Geographic ka bërë publike listën vjetore “Best of the World 2027”, me 25 destinacione në gjashtë kontinente që rekomandohen për t’u vizituar në vitin 2027. Përzgjedhja, e përgatitur nga rrjeti ndërkombëtar i gazetarëve, fotografëve dhe eksploruesve të revistës, mbështetet te bukuritë natyrore, trashëgimia kulturore dhe zhvillimet e reja në turizëm. Lista shtrihet nga fjordet norvegjeze dhe qytetet historike europiane deri te plazhet e Karaibeve dhe peizazhet aziatike.
Europa me prani të fortë
Kontinenti europian zë një vend të rëndësishëm në renditje, me destinacione në Norvegji, Skoci, Spanjë, Francë, Gjermani dhe Poloni. Në krye të listës qëndron rajoni Vestland në Norvegji, i vlerësuar për fjordet mbresëlënëse, ujëvarat dhe mundësitë për turizëm në natyrë. Pjesë e këtij rajoni është edhe Bergeni, qytet që tërheq vizitorë me arkitekturën e tij historike dhe kuzhinën nordike.
Në Francë, Normandia pritet të jetë një nga pikat e nxehta të vitit 2027, me mbi një mijë aktivitete kulturore për përkujtimin e njëmijëvjetorit të lindjes së Uilliam Pushtuesit. Gjermania përfaqësohet nga Leipzigu, qytet me traditë të pasur muzikore, ku do të zhvillohen festivale dhe ngjarje kushtuar kompozitorëve të mëdhenj. Ndërkohë, Santanderi në Spanjë po fiton profilin e një qendre kulturore falë hapjes së muzeve të reja të artit.
Azia, Afrika dhe Amerikat
Nga Azia janë përzgjedhur Penangu në Malajzi, Niigata në Japoni, Chengdu në Kinë dhe Jaipuri në Indi, destinacione që kombinojnë traditat historike me gastronominë, artin dhe investimet në infrastrukturën turistike. Luksori në Egjipt veçohet për një ngjarje të rrallë: më 2 gusht 2027 pritet aty një eklips total diellor, i cili do ta vendosë qytetin historik në qendër të vëmendjes së turistëve.
Në Amerikën Latine renditen destinacione në Brazil, Kili, Meksikë dhe Peru, ndërsa nga Afrika përfshihet Malavi, si alternativë për turizmin në natyrë larg vendeve të mbingarkuara me vizitorë.
Shqipëria jashtë përzgjedhjes
Shqipëria nuk figuron në listën e këtij viti. Nga rajoni më i gjerë është përfshirë Armenia, me shtegun Transkaukazian, që hap mundësi të reja për turizmin malor dhe atë të aventurës.
Lista e plotë e destinacioneve për 2027
- Vestland, Norvegji
- Penang, Malajzi
- Luksor, Egjipt
- Madison, Wisconsin, SHBA
- Porto Riko
- Dumfries dhe Galloway, Skoci
- Niigata, Japoni
- Chengdu, Kinë
- Autostrada e Bregut të Paqësorit, Kaliforni, SHBA
- Jaipur, Indi
- Grenada
- Salvador, Brazil
- Cape Froward, Kili
- Santander, Spanjë
- Normandi, Francë
- Malet Ozark Jugore, SHBA
- Halifax, Kanada
- Shtegu Transkaukazian, Armeni
- Melburn, Australi
- Leipzig, Gjermani
- Baltimore, Maryland, SHBA
- Malavi
- Maya Ka’an, Meksikë
- Tricity (Gdańsk, Sopot dhe Gdynia), Poloni
- Kuélap, Chachapoyas, Peru
