Buxhet social me në qendër qytetarin, duke ruajtur ekuilibrat mes të ardhurave dhe shpenzimeve.
Hilda Shijaku, ekonomiste pranë Bankës Botërore në Shqipëri, thotë për A2 CNN:
“Fokusi i rekomandimeve tona është ruajtja e parametrave të konsolidimit fiskal, arritja e balancës primare pozitive e cila do të ndihmojë edhe në reduktimin e borxhit”.
Ndërsa paketa fiskale për vitin 2024 për Bankën Botërore nuk duhet të mbajë më disa nga përjashtimet fiskale që prej kohësh i kanë sektorë të ndryshëm të ekonomisë.
“Përjashtimet fiskale, megjithëse jepen për të nxitur sektorë apo kategori të caktuara, në shumë raste, kostot janë më të larta se përfitimet”.
Teksa shprehet në mbështetje të nismës për sigurimin e detyrueshëm ndaj tërmeteve, Banka Botërore kërkon që qeveria t’u vijë në ndihmë atyre që e kanë të pamundur të paguajnë.
Keler Gjika, ekonomist i Bankës Botërore, shprehet:
“Duhet të ketë menaxhim të mirë risku, bazuar në praktikat më të mira ndërkombëtare, siç ne i kemi sugjeruar qeverisë. Gjithashtu, për shtresat në nevojë duhet ndoshta të ketë ndërhyrje nga ana e qeverisë te primet e sigurimit”.
Banka Botërore pret që ekonomia e Shqipërisë të rritet me 3,6% këtë vit dhe 3,2% vitin e ardhshëm. Sipas institucioneve më të larta monetare në botë, në Ballkanin Perëndimor do të jetë Mali i Zi që do të ketë rritjen më të lartë ekonomike këtë vit.
Nga ana tjetër, Serbia dhe Maqedonia e Veriut pritet të jenë dy vendet me rritjen më të ulët ekonomike me 2 dhe 1,8%.
Burimi: A2 CNN
