Projektbuxheti i vitit 2027 parashikon rreth 5.52 miliardë lekë për Korridorin VIII, duke e vendosur këtë aks ndër investimet rrugore me fondet më të mëdha. Përveç pagesave për kontratat që janë aktualisht në zbatim, vitin e ardhshëm do të nisë financimi i fazave të reja, me të cilat ndërtimi shtrihet drejt Peqinit dhe Qafë-Thanës.

Tri faza të reja nga Ura e Grykshit në Peqin

Sipas listës së shpenzimeve, në vitin 2027 do të fillojë financimi për tri faza të reja që shtrihen nga Ura e Grykshit deri në Peqin. Faza e parë do të marrë 800 milionë lekë, ndërsa secila nga dy fazat e tjera do të marrë nga 600 milionë lekë. Kështu, këto tri kontrata do të përfitojnë gjithsej 2 miliardë lekë gjatë vitit 2027, ndërkohë që kostoja e plotë për përfundimin e tyre vlerësohet në 10 miliardë lekë.

Programi buxhetor përfshin edhe dy faza të tjera, në vazhdim nga Peqini në Lekaj. Për këto segmente nuk janë parashikuar fonde në dy vitet e ardhshme. Financimi i tyre pritet të nisë në vitin 2029, me nga 600 milionë lekë për secilën fazë, ndërsa vlera totale e nevojshme për përfundimin arrin në 6 miliardë lekë.

Të gjitha këto investime janë pjesë e aksit të ri Elbasan–Rrogozhinë, me gjatësi të përgjithshme 40.7 km. Rruga fillon pranë ish-Kombinatit Metalurgjik në Elbasan dhe mbaron në Lekaj, ku bashkohet me autostradën ekzistuese të Korridorit Blu. Gjashtë fazat e para, në të cilat po punohet aktualisht, përfshijnë rreth 20 km të këtij aksi.

Faza e nëntë dhe tuneli i Hotolishtit

Në drejtimin Elbasan–Qafë-Thanë, projektbuxheti parashikon nisjen e financimit për fazën e nëntë, me 1 miliard lekë në vitin 2027. Vlera e plotë e kësaj faze është planifikuar në 5 miliardë lekë, me pagesa që do të vazhdojnë edhe përtej vitit 2029. Sipas informacioneve të publikuara më parë, kjo fazë përfshin tunelin e Hotolishtit.

Në këtë drejtim janë hapur tashmë për qarkullim 7.5 kilometrat e parë, nga dalja e Labinot-Fushës deri përtej fshatit Mirakë, me nga dy korsi në secilin kah.

Lidhja me aksin Tiranë–Elbasan

Projektbuxheti garanton fonde edhe për dy kontratat në zbatim të rrugës që lidh aksin Tiranë–Elbasan me Korridorin VIII. Në listë është përfshirë edhe një fazë e tretë e kësaj lidhjeje, por financimi i saj pritet të nisë në vitin 2028. Ky segment është pjesë e bypass-it të Elbasanit, i cili do të lidhë rrugën Elbasan–Qafë-Thanë me atë Elbasan–Lekaj.