Protestues u mblodhën të mërkurën në mbrëmje në Athinë për të kundërshtuar kostot e larta të strehimit në Greqi, duke shprehur njëkohësisht solidaritet me punëtorët në Spanjë, të cilët organizuan një grevë të përgjithshme. Pjesëmarrësit theksuan se përballen me qira gjithnjë e më të shtrenjta dhe me mungesë banesash që mund t’i përballojnë.
Të rinjtë, më të goditurit
Çmimet e shitjes së shtëpive dhe qiratë në vend janë rritur ndjeshëm. Grekët, veçanërisht çiftet e reja dhe studentët, e kanë të vështirë të gjejnë një strehë me kosto të arsyeshme dhe shumë prej tyre detyrohen të vazhdojnë të jetojnë me prindërit.
Të dhënat e Eurostat tregojnë se në vitin 2025, 25% e të rinjve në Greqi ishin të mbingarkuar nga kostot e strehimit, një nga nivelet më të larta në Bashkimin Europian. Ata jetonin në familje që shpenzonin 40% ose më shumë të të ardhurave të disponueshme për banesën.
Rimëkëmbja ekonomike dhe paga minimale
Greqia po kalon një rimëkëmbje të fuqishme pas krizës së borxhit të viteve 2009-2018, e cila zhduku gati një të katërtën e prodhimit të vendit dhe solli shkurtime të pensioneve dhe pagave.
Qeveria e kryeministrit Kyriakos Mitsotakis, i cili siguroi mandatin e dytë në vitin 2023, ka ulur taksat dhe kontributet e sigurimeve shoqërore. Ajo ka rritur pesë herë që nga viti 2022 pagën minimale për punonjësit me kohë të plotë dhe planifikon një rritje të re në vitin 2027.
Megjithatë, sipas grekëve, paga minimale aktuale prej 920 eurosh nuk mjafton ende për të përballuar koston në rritje të jetesës.
