Qeveria ka miratuar një vendim që përcakton financimin nga shteti për familjet që marrin në kujdes fëmijë përmes skemës së kujdesit alternativ. Sipas vendimit, për çdo fëmijë të vendosur në një familje kujdestare do të jepen 12 mijë lekë në muaj për shpenzimet e përditshme, si dhe 35 mijë lekë në vit për nevoja të tjera.
Në total, mbështetja për një fëmijë shkon në 179 mijë lekë në vit, që përkthehet mesatarisht në rreth 14 900 lekë në muaj. Vendimi përcakton gjithashtu kushtet e përfitimit dhe mënyrën se si do të kryhen pagesat.
Pagesë sa paga minimale për familjet profesionale
Përveç mbështetjes për fëmijët, familjet që ofrojnë kujdes alternativ profesional do të paguhen edhe për shërbimin që japin. Ato do të marrin një pagesë mujore shtesë, të barabartë me pagën minimale në vend. Kjo shumë jepet vetëm një herë për familje, pavarësisht sa fëmijë ka në kujdestari, dhe vazhdon për sa kohë familja mbetet e regjistruar si ofruese e shërbimit dhe kujdeset për të paktën një fëmijë.
Vendimi parashikon që njëri prej prindërve kujdestarë profesionistë të lidhë kontratë pune me bashkinë ku ka vendbanimin e përhershëm. Pagesa mund të përfitohet edhe kur prindi është i punësuar ose i vetëpunësuar, me kusht që angazhimet e tjera të mos cenojnë kujdesin dhe mirëqenien e fëmijës.
Trajtim i veçantë për rastet e emergjencës
Për familjet kujdestare profesionale të emergjencës është parashikuar një rregull i posaçëm: ato e marrin pagesën që nga momenti i lidhjes së kontratës së punës dhe deri në përfundimin e saj ose deri në humbjen e statusit përkatës.
Indeksim me inflacionin
Mbështetja financiare mujore dhe vjetore për fëmijët do të indeksohet çdo vit në bazë të inflacionit. Fondet për skemën do të mbulohen nga buxheti i shtetit dhe do t'u transferohen bashkive, të cilat janë përgjegjëse për zbatimin e saj.
