Buxheti 2027: një në tre lekë do të shkojë për mbrojtjen sociale, ndërsa popullsia plaket

Rreth një e treta e shpenzimeve publike të vitit të ardhshëm do të drejtohet te mbrojtja sociale. Buxheti i vitit 2027 përllogaritet në mbi 10 miliardë euro gjithsej. Prej tyre, rreth 315 milionë euro do t'u shkojnë kategorive që kanë nevojë për mbështetjen e drejtpërdrejtë të shtetit.

Ku do të shkojnë paratë

Fondi për mbrojtjen sociale, që vitin e ardhshëm arrin rreth 3.4 miliardë euro, pritet të mbulojë rritjen e pensioneve, si dhe pagesat e ndihmës ekonomike dhe të papunësisë. Një pjesë e fondeve do të përdoret edhe për vijimin e programit "Bonusi i Bebes", i cili tani jepet me pagesa mujore.

Plakja e popullsisë rëndon skemën

Eksperte e ekonomisë Zana Guxholli e lidh presionin mbi buxhetin me ndryshimet demografike dhe pret që këto prirje të forcohen në vitet në vijim.

"Ka disa dukuri që po e vënë buxhetin në krizë dhe besoj se në të ardhmen do të bëhen edhe më të forta. Fakti që popullsia po plaket, numri i të moshuarave ka arritur në 700 mijë, rreth 12-14 mijë pensionistë i shtohen skemës. Vazhdimisht, buxheti është i kërcënuar për të financuar mbrojtjen sociale"

Sipas saj, fondet e parashikuara nuk mjaftojnë: "Madhësia e këtij buxheti është e pamjaftueshme. Edhe në vendet ku pensionet në vendet ku pensionet janë më të mëdha, sërish ato mbeten të pamjaftueshme".

Varfëria dhe kriza e çmimeve

Sociologia Eris Dhamo thotë se ndihma sociale nuk mund ta zëvendësojë rritjen ekonomike si mënyrë për të ulur varfërinë.

"Ne e dimë që kemi rreth 40 për qind të popullsisë në varfëri dhe ato duhet të ndihmohen që të dalin nga aty. Po mbështetja më e mirë nuk është rritja e ndihmës ekonomike, por forcimi i ekonomisë në përgjithësi"

Për Dhamo, problemi nuk lidhet me mungesën e mjeteve, por me prioritetet e qeverisë: "Kriza e çmimeve është ende nëpër këmbë. Të gjithë po bëhen më të varfër. Për mua nuk është se qeveria nuk ka mundësi, thjesht ajo nuk e ka vëmendjen këtu".

Kjo shpërndarje e fondeve ngre pyetjen nëse projektbuxheti 2027 mund të quhet buxhet social dhe sa ndryshon nga ato të viteve të kaluara.

Në raport me shpenzimet totale, Shqipëria shpenzon për mbrojtjen sociale më shumë se çdo vend tjetër i Ballkanit Perëndimor. Shkak kryesor është niveli i lartë i varfërisë, i cili u thellua edhe më shumë nga kriza e çmimeve.