Një nismë e propozuar nga deputeti i Partisë Demokratike, Igli Cara, e cila kërkonte përjashtimin e pensionistëve të punësuar nga pagesa e sigurimeve shoqërore, nuk ka marrë mbështetjen e mazhorancës në Kuvend. Deputeti argumentoi se këta qytetarë detyrohen të qëndrojnë në tregun e punës për shkak të pensioneve të ulëta dhe nuk përfitojnë asgjë nga kontributet shtesë që derdhin.
"Ai e ka kryer detyrimin e tij ka kontribuar gjithë ato vite dhe ka dalë në pension, për këto vite që punon mund të paguaj sigurime 10 milionë euro dhe nuk merr asnjë lekë. Ato paguajnë sigurime përsëri për një skemë që nuk do ti marrin më, kur do iu rikthehen këto para? A nuk quhet kjo marrje e padrejtë?", u shpreh deputeti i PD, Igli Cara.
Nga ana e saj, qeveria ka kundërshtuar këtë draft, por zëvendësministrja e Ekonomisë, Olta Manjani, bëri të ditur se ekzekutivi po shqyrton dy opsione për këtë kategori përmes një skeme të re që po punohet prej dy vitesh. Sipas saj, mund të aplikohet ose dhënia e një bonusi, ose rritja e pensionit mujor për këta persona.
"Nga njëra është rillogaritja e pensionit mbi bazën e kontributeve shtesë, ose dhënia e një pagese për çdo vit sigurimi pas daljes në pension", u shpreh Olta Manjani, zëvendësministre e MEKI.
Zëvendësministrja shtoi se reforma synon të adresojë mjaftueshmërinë e pensionit dhe qëndrueshmërinë fiskale të skemës, duke qenë se aktualisht ajo paraqet një deficit prej 200 milionë eurosh. Në përfundim të diskutimeve në Komisionin e Bujqësisë, me 8 vota kundër të mazhorancës dhe 5 pro të opozitës, projektligji u rrëzua.
Të dhënat zyrtare tregojnë se numri i shqiptarëve që vazhdojnë të punojnë edhe pas daljes në pension ka arritur në 144.955. Krahasuar me një vit më parë, kur numri i të punësuarve mbi 64 vjeç ishte 131.200, shifra është rritur me rreth 13.700 persona, ose 10.5 për qind.
