Remitancat përbëjnë një ndër financuesit kryesor të konsumit në Kosovë. Sipas publikimit më të fundit të Bankës Qendrore të vendit, në fund të muajit qershor dërgesat e emigrantëvë përbënin 14.9% të Prodhimit të Brendshëm Bruto. Vlera e remitancave në tremujorin e dytë të vitit u regjistrua në 314.11 milionë euro, me një rritje vjetore prej 0.82%.
Sipas Bankës Qendrore të Kosovës, rritja më e ngadalshme e remitancave këtë tremujor mund t’i atribuohet deri në një masë pasigurive të rritura gjatë kësaj periudhe në vendet dërguese, si dhe ndikimit potencial të masave fiskale të ndërmarra në formë të subvencionimit për grupet më të ndjeshme sociale. Struktura e remitancave ka mbetur e pandryshuar, për sa i përket vendeve dërguese, ku Gjermania dhe Zvicra përbëjnë rreth 56.8% të totalit.
Ndërkohë, vërehet se në të njëjtën periudhë investimet e huaja direkte arritën në vlerë prej 210.78 milionë euro, apo 74.16% më shumë në bazë vjetore. Rritja më e madhe është vërejtur tek kapitali dhe fondi i investimeve në aksione prej rreth 129.12 milionë euro, ndërsa instrumentet e borxhit shënuan rritje prej 36.7 milionë euro.
Struktura e investimeve të huaja direkte mbeti e pandryshuar, e përqëndruar kryesisht në sektorin e pasurive të paluajtshme me 56.92% dhe sektorin financiar. Kjo rritje e investimeve të huaja direkte, sipas Bankës Qendrore në pasuri të paluajtshme ndër të tjera mund t’i atribuohet edhe rritjes së çmimeve të inputeve për koston e ndërtimit që shënuan rritje vjetore prej 19.8% gjatë kësaj periudhe.
Performanca e kompanive në sektorët tjerë ishte e mirë ku bilanci i fitimit të riinvestuar deri në qeshor ishte 89% më i lartë në bazë vjetore.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
