Administrata Trump i bëri thirrje të premten Pekinit që të përmbushë pa vonesë detyrimet që rrjedhin nga marrëveshja tregtare e nënshkruar gati një vit më parë, me theks të veçantë te furnizimi me metale të rralla e minerale të tjera kritike, si dhe te blerjet e produkteve bujqësore.
Kërkesa u përcoll gjatë një bisede telefonike që Sekretari i Thesarit, Scott Bessent, dhe Përfaqësuesi i Tregtisë i SHBA-së, Jamieson Greer, zhvilluan me zëvendëskryeministrin kinez He Lifeng. Zyrtarët amerikanë i kërkuan atij zbatimin e kushteve të paktit të arritur në Korenë e Jugut në tetor 2025.
Nga ana e tij, negociatori kryesor kinez për marrëdhëniet tregtare me Uashingtonin deklaroi se është rënë dakord me palën amerikane për të vijuar konsultimet, me synimin e një zhvillimi "të qëndrueshëm dhe pozitiv" të tregtisë dypalëshe.
Takimet e pritshme Trump–Xi
Presidenti Donald Trump dhe homologu i tij Xi Jinping pritet të takohen në samitin e forumit të Bashkëpunimit Ekonomik Azi-Paqësor (APEC) në Shenzhen të Kinës, më 18 dhe 19 nëntor, si dhe në samitin e G20 në Miami, më 14 dhe 15 dhjetor.
Uashingtoni ka bërë të ditur se do të synojë një tregti të ekuilibruar me Kinën duke "monitoruar pajtueshmërinë me angazhimet e kaluara, duke zhbllokuar përfitime të qëndrueshme për fermerët, blegtorët, prodhuesit dhe punëtorët amerikanë".
Çfarë parashikon pakti i Busanit
Marrëveshja e Busanit, afati i së cilës përfundon më 10 janar, i vendosi një kufi prej rreth 20% tarifave amerikane mbi mallrat kineze, të aplikuara gjatë mandatit të dytë të Trump. Në këmbim, Kina u angazhua të blejë 25 milionë ton sojë amerikane gjatë tre viteve të ardhshme dhe të shtojë me 17 miliardë dollarë blerjet e produkteve të tjera bujqësore nga SHBA.
Pekini, megjithatë, ka lënë të kuptohet se lehtësimet tarifore mbeten kusht thelbësor. Ministri kinez i Tregtisë deklaroi se vendi është i gatshëm të blejë më shumë mallra bujqësore amerikane, por vetëm nëse të dyja palët zbatojnë marrëveshjen reciproke për uljen e tarifave.
